Inteligjenca amerikane: Shteti Islamik mund ta sulmojë SHBA-në

Komuniteti i inteligjencës amerikane vlerëson se i ashtuquajturi Shteti Islamik në Afganistan mund të sulmojë Shtetet e Bashkuara në gjashtë muajt e ardhshëm

Shteti Islamik synon ta bëjë këtë, tha sot zyrtari i lartë i Pentagonit, Colin Kahl.

Deklaratat e nënsekretarit të Ministrisë së Mbrojtjes, Colin Kahl, janë kujtimi i fundit se Afganistani mund të vazhdojë të përbëjë një kërcënim serioz për sigurinë kombëtare të Shteteve të Bashkuara, raporton Reuters.

Duke dëshmuar para Komitetit të Shërbimeve të Armatosura të Senatit, Kahl tha se nuk ishte ende e qartë nëse talebanët kishin forcën për të luftuar në mënyrë efektive Shtetin Islamik, pasi trupat ushtarake amerikane u tërhoqën në gusht.

Shtetet e Bashkuara kanë luftuar talebanët, si dhe të ashtuquajturin Shteti Islamik dhe Al Kaedën, sipas Reuters.

Kahl vlerësoi se i ashtuquajturi Shteti Islamik ka një “kuadro prej disa mijëra” luftëtarësh.

Ministri i Jashtëm në detyrë Amir Khan Mutaki i qeverisë së re të talebanëve tha se ata do të trajtojnë kërcënimin e paraqitur nga militantët e Shtetit Islamik.

Ai tha gjithashtu se Afganistani nuk do të bëhet bazë për sulme ndaj vendeve të tjera.

Kahl sugjeroi se Al Kaeda është një problem më kompleks në Afganistan, duke pasur parasysh lidhjet e saj me talebanët.

Ai theksoi se Al Kaedës do t’i duheshin “një ose dy vjet” për të ripërtërirë fuqinë e saj për sulme jashtë Afganistanit, përkatësisht Shtetet e Bashkuara.

Zyrtarët amerikanë paralajmërojnë se identifikimi dhe ndërhyrja në grupe të tilla si Al Kaeda dhe Shteti Islamik është jashtëzakonisht e vështirë pa asnjë trupë në vend.

Kahl tha se Shtetet e Bashkuara nuk kanë pasur ende ndonjë marrëveshje me vendet përreth Afganistanit për vendosjen e trupave për të luftuar terrorizmin.