Një përplasje e ashpër ka ndodhur në Kuvendin e Kosovës mes kryeministrit Avdullah Hoti dhe deputetes së Lëvizjes Vetëvendosje, Fatmire Mulhaxha-Kollçaku.

Deputetja Mulhaxha-Kollçaku në fjalimin e saj ka thënë se Qeveria nuk po i përmbush kërkesat e policëve dhe të profesionistëve shëndetësor, transmeton Telegrafi.

“Kjo qeveri ilegjitime nuk po i përmbush kërkesat jo vetëm të policëve, por edhe të profesionistëve shëndetësor. Nuk po përmbushet Pakoja emergjente, por po bëni edhe dallime të mëdha duke mos u përfshirë rrezikshmëria në punë, edhe për profesionistët shëndetësor por edhe për policët”, ka thënë deputetja.

Pas kësaj, ka reaguar kryeministri Avdullah Hoti duke thënë se LVV e ka hallin vetëm se si ta shajë Qeverinë.

“A din ku e keni hallin ju, ju doni me u ballafaqu me mu, me shajtë Qeverinë. Juve nuk ju intereson problemi i policëve. Unë i kam 3 muaj si kryeministër. Pyetni policët se si kanë kaluar kur kam qenë ministër i Financave, për tri vjet. Ju çdo gjë doni ta ktheni në politikë. I keni nxjerrë policët në rrugë për 12 orë, i keni mbyllë njerëzit për 3 muaj, karantinë e plotë. Edhe shkoni krenoheni pse numrat nuk janë rritur gjatë kohës sa kanë qenë të mbyllur”, ka thënë Hoti.

Ai ka thënë se gjendja sa i përket pandemisë është nën kontroll. /Telegrafi/