Historia e “koktej Molotov” – një rrëfim për prejardhjen e emrit të ‘pajisjes ndezëse’, të cilën ukrainasit po e përdorin për të luftuar kundër rusëve

Në qytetin ukrainas të Lviv, studentë dhe artistë janë parë duke bërë “kokteje Molotov”.

Veç tyre, në një periferi të Kievit, një ekonomiste në pension tregoi stokun e saj të pajisjeve ndezëse, duke shpjeguar se ajo i ka ndërtuar ato pasi ka kërkuar udhëzime në Google.

Ndërsa në Dnipro, gratë ishin mbledhur për të ‘prodhuar’ bomba të improvizuara.

“Duket si e vetmja gjë e rëndësishme për të bërë tani”, thoshte një mësues vendas, përcjell Telegrafi.

Kështu, me vazhdimin e agresionit rus mbi vendin e tyre, qytetarë në të gjithë vendin më të madh të Evropës po përgatisin sasi të mëdha “kokteje Molotov” për të luftuar kundër forcave pushtuese.

Por për gati një shekull, pajisja ka qenë arma “më e arritshme për të pafuqishmit” që luftojnë kundër një armiku “teknologjikisht superior”.

Koktejet Molotov janë shumë më efektive se gurët, por jo shumë më të vështirë për t’u gjetur. Gjithçka që nevojitet është një shishe qelqi dhe disa përbërës të ndezshëm.

Dhe tanket ruse kanë qenë prej kohësh objektivi i tyre.

Lexo po ashtu Njihuni me "hakerët ukrainas që po luftojnë Rusinë nga shtëpitë e tyre" - ata janë rreth 300 mijë

Rebelët nacionalistë të krahut të djathtë në Luftën Civile Spanjolle përdorën për herë të parë “bomba benzine” në vitin 1937 kundër tankeve sovjetike.

Sidoqoftë, njerëzit e Finlandës ishin ata që dolën me një emër të tillë.

Emri ishte një referencë poshtëruese për ministrin e jashtëm sovjetik Vyacheslav Molotov.

Origjina e emrit thuhet se erdhi nga propaganda e Molotovit gjatë Luftës së Dimrit, kryesisht deklarata e tij në radion shtetërore sovjetike se misionet e bombardimeve mbi Finlandë ishin në fakt “dërgesa ushqimore humanitare nga ajri për fqinjët e tyre të uritur”.

Bëhet fjalë për luftën që filloi me një pushtim sovjetik të Finlandës më 30 nëntor 1939, tre muaj pas shpërthimit të Luftës së Dytë Botërore dhe e cila përfundoi tre muaj e gjysmë më vonë me një traktat paqeje më 13 mars 1940.

Si rezultat, finlandezët i quajtën me sarkazëm bombat sovjetike “Shporta me bukë Molotov”.

Lexo po ashtu Ata nuk duan të bëhen "mish për top": Rrëfimet e ushtarëve të Putinit që duan të largohen nga lufta në Ukrainë - disa edhe duke lënduar veten

Dhe kur bomba e zjarrit me shishe u zhvillua për të sulmuar dhe shkatërruar tanket sovjetike, finlandezët e quajtën atë “koktej Molotov”, si “një pije për të shkuar me pakot e tij ushqimore”.

Fabrikat shtetërore të pijeve kishin kaluar tashmë nga prodhimi i vodkës në përgatitjen e sasive të mëdha të pajisjeve ndezëse të improvizuara, të cilat trupat finlandeze i përdorën me efekt të madh kundër armatës sovjetike.

Pas kësaj, emri “koktej Molotov” mbeti dhe u përhap shpejt në mbarë botën, përcjell Telegrafi.

Madje gjatë Luftës së Dytë Botërore, Qeveria britanike trajnoi Gardën e Brendshme – burra shumë të moshuar për të luftuar në ushtrinë e rregullt – në përdorimin e atyre që quheshin “kokteje à la Molotov”.

Në një video trajnimi, vullnetarëve iu tregua se si të ndërtonin një barrikadë për të ndaluar një tank nazist përpara se të bombardonin ato me kokteje Molotov.

Ndërsa pas Luftës së Dytë Botërore, kur populli hungarez u ngrit kundër kontrollit sovjetik në vitin 1956, kokteji Molotov ishte arma e tyre e zgjedhur.

Ata shkatërruan rreth 400 tanke përpara se rebelimi të shtypej.

Lexo po ashtu Pse anëtarësimi i Finlandës në NATO është një lajm shumë i keq për Putinin?

Që atëherë, koktejet Molotov janë përdorur në mbarë botën gjatë protestave dhe konflikteve të armatosura.

Për shembull, ndër tjerash, palestinezët i hodhën ato mbi ushtarët izraelitë; protestuesit kundër shahut gjatë revolucionit iranian; demonstruesit në Hong Kong i flakën ato gjatë goditjes së fundit kineze, si dhe në SHBA, ato janë ndezur gjatë protestave racore.

Kështu ndodhi dhe po vazhdon të ndodhë edhe në Ukrainë, edhe pse Kremlini pretendoi fillimisht se trupat ruse do të priten ngrohtësisht në Ukrainë.

Por në vend të kësaj, ata “u pritën me kokteje Molotov”. /Telegrafi/