Gjykata në Ferizaj aprovoi kërkesën e avokatit, Krivaqës i lejojet t’i bëhet ekzaminimi psikiatrik

Kërkesa e avokatit mbrojtës të Dardan Krivaqës, Admir Salihu që klientit të tij, t’i bëhet një ekzaminim për të parë gjendjen psikiatrike është aprovuar nga Gjykata Themelore në Ferizaj.

Lajmin për Telegrafin e ka konfirmuar u.d zyrtarja për informim dhe monitorimin e mediave, Gentiana Hoxha.

Sipas saj, gjyqtari e ka aprovuar kërkesën e mbrojtësit të të pandehurit D.K për ekzaminim psikiatrik në Institutin e Psikiatrisë Forenzike.

“Ju njoftoj se gjyqtari i çështjes ka aprovuar kërkesën e mbrojtësit të të pandehurit D.K. lidhur me ekzaminimin psikiatrik në Institutin e Psikiatrisë Forenzike”, ka thënë Hoxha për Telegrafin.

Lexo po ashtu Instituti i Psikiatrisë Forenzike: Aty ku del e vërteta, për veprat e këqija që i bën sëmundja (Foto)

Ndryshe, mbrojtësi i të akuzuarit Dardan Krivaqa, avokati Admir Salihu në një nga seancat kishte propozuar që për seancë të radhës të ftohet mjeku që e ka kontrolluar të akuzuarin Dardan Krivaqa në ditën kur është mbajtur seanca dëgjimore për caktimin e paraburgimit, Astrit Hoxha, mjek në emergjencën e Ferizajt.

Lexo po ashtu Rasti i Marigona Osmanit, dëshmitari thotë se në banesën e Dardan Krivaqës kishte shkuar për t’i kthyer kamerat 5-6 ditë prapa dhe jo për t’i fshirë

Sipas avokatit Salihu, ky propozim bëhej për arsye se doktor Astrit Hoxha ka dhënë një deklaratë me disa rekomandime të cilat nuk janë marrë parasysh nga institucionet.

Ndryshe, më 14 korrik 2022, është mbajtur seanca fillestare ku Dardan Krivaqa ka shfrytëzuar të drejtën të mbrohet në heshtje, kurse Arbër Sejdiu, është deklaruar i pafajshëm.

Krivaqën prokuroria e ngarkon me veprën penale vrasje e rëndë dhe dhunim, kurse Sejdiu po akuzohet për veprën penale vrasje e rëndë dhe ndihmë në kryerjen e dhunimit.

Sipas aktakuzës i pandehuri Dardan Krivaqa më 21 gusht 2021, rreth orës 10:14, në banesën e tij në rrugën “Ramadan Rexhepi”, në Ferizaj, pa pëlqimin e tani të ndjerës Marigona Osmani, e kishte detyruar të njëjtën për të kryer marrëdhënie seksuale, e cila siç thuhet në aktakuzë përcillet me tortura.

Gjithnjë sipas aktakuzës, aty thuhet se i pandehuri Krivaqa fillimisht pa dëshirën e tani të ndjerës ka kryer marrëdhënie seksuale në sallon, pas kryerjes së aktit seksual të njëjtën të zhveshur e kishte dërguar në banjo, nga aty me dhunë e kishte dërguar në dhomën e gjumit, mirëpo me kalimin e kohës për shkak të gjendjes së rëndë shëndetësore tani e ndjera Marigona Osmani si pasojë e dhunës së ushtruar kishte humbur aftësinë për të rezistuar, e ku në dy raste në mbrëmje kishin kryer marrëdhënie seksuale, pastaj i pandehuri Dardan të zhveshur e kishte dërguar në banjë, e ku i vërehen edhe lëndimet në trup. /Telegrafi/