Gjilani dhe Feronikeli ndajnë pikët

Nuk ka sjellë fitues ndeshja hapëse e javës 27-të mes Gjilanit dhe Feronikelit që u ndanë në paqe 0-0.

Gjilani në këtë takim hynte pas ndryshimeve në shtabin teknik ku u largua trajneri prishtinas Arbnor Morina.

E klubi bardh e kuq ia besoi pozitën e trajnerit legjendës së tyre Alban Hysenit.

Qysh në minutën e 10-të Feronikeli ka mundur të kalojë në epërsi pasi mbrojtësi i vendasve Fisnik Papuqi për pak sa nuk shënoi autogol.

Ndeshja u zhvillua kryesisht në mesfushë me dy skuadrat që luajtën kujdesshëm.

Rastin më të mirë në pjesën e parë e pati Feronikeli kur në minutën e 30’, kur Mark Milicaj goditi bukur nga distanca por edhe më bukur reagoi portieri vendas Kaçiu.

Në minutën e 37’, Gjilani u kundërpërgjigj me Leutrim Bekteshin por që goditja e tij nuk ishte e saktë.

Me rezultatin e barabartë 0-0 përfunduan 45 minutat e para në këtë takim.

Edhe pjesën e dytë dy ekipet e luanin me mjaftë kujdes duke mos rrezikuar.

Milicaj kishte një mundësi të mirë shënimi kur tentoi shënimin e golit nga gjuajtja e lirë por pa sukses.

Deri në fund nuk pati ndonjë rast dhe dy skuadrat ndanë pikët.

Gjilani kësisoj mbetet në pozitën e shtatë në tabelë me 40 pikë të tubuara, ndërsa Feronikeli në të pestën me një pikë më shumë.

Në ndeshjen e ardhshme Gjilani luan përsëri si vendas pasi pret kampionin në fuqi Trepçën ’89, ndërsa Feronikeli luan në Drenas me Lirinë e Prizrenit. /Telegrafi/