Organizata GERMIN ka realizuar një analizë ku në detaje shpjegohen pengesat që kanë hasur qytetarët e diasporës gjatë Zgjedhjeve Lokale të mbajtura në fund të vitit të 2021.

“Problemet me regjistrimin, dërgimin dhe pranimin e zarfeve me fletëvotime nga jashtë si dhe mungesa e informimit dhe edukimit të duhur të votuesve, kanë përcjellë pothuajse çdo cikël zgjedhor, përfshirë edhe atë të Zgjedhjeve Lokale, raundi i parë i të cilave u mbajt me 17 tetor 2021 ndërsa raundi i dytë me 14 nëntor 2021”, thuhet në njoftim.

Sipas njoftimit bëhet e ditur se kjo analizë paraqet një përmbledhje të këtij procesi, përfshirë pengesat gjatë procesit të votimit nga jashtë dhe ofron një pasqyrë të detajuar të të gjitha operacioneve zgjedhore në kuadër të tij.

Reklama
Reklama

Në konkluzionet e nxjerra nga kjo analizë vërehet se ka pasur interes të shtuar të diasporës gjatë viteve të fundit, kjo sidomos nga numri i madh i aplikuesve për të votuar nga jashtë vendit, specifikisht në zgjedhjet parlamentare të 14 shkurtit 2021.

“Ndikimi dhe interesi është parë edhe në zgjedhjet lokale 2021, ku numri i aplikuesve në krahasim me zgjedhjet paraprake të vitit 2017 është 7,000 aplikues më shumë. Në krahasim me zgjedhjet lokale të 2017, në këto zgjedhje përveç që interesi ka qenë më i madh edhe procesi i votimit nga jashtë ka kaluar më mirë dhe ka qenë më transparent. Vlen të theksohet se kësaj radhe, përjashtimisht rastit të Komunës së Dragashit, nuk janë vërejtur manipulime apo tendenca të tilla”, thuhet në analizë.

Reklama
Reklama

GERMIN ka nxjerr disa rekomandime që procesi i votimit nga jashtë të lehtësohet:

  1. Zhvillimi i një paltforme elektronike për aplikim për regjistrim në ueb-faqen e KQZ-së
  2. Votimi vetëm me dokumente të Republikës së Kosovës
  3. Dërgimi i postës në ambasada dhe konsullata të Republikës
  4. Të (ri)shqyrtohet çështja e votimit nga jashtë në zgjedhjet lokale.

Analizën e plotë të GERMIN mund ta gjeni duke klikuar KËTU/Telegrafi/