Gentjan Mezani ka besimin e Gjilanit

Gjatë ditës së djeshme u raportua se klubi futbollistik i Gjilanit sezonin e ardhshëm do të angazhojë një trajner të ri.

Gentjan Mezani muaj më parë ka marrë drejtimin e klubit, por rezultatet e dobëta kanë bërë që të qarkullojnë zëra se do të shkarkohet.

Klubi gjilanas ka reaguar përmes rrjeteve sociale duke hedhur poshtë shkrimet dhe ritheksuar besimin për trajnerin shqiptar.

“SC Gjilani informon publikun se pas shkrimeve të fundit që po qarkullojnë nëpër mediumet dhe gazetat tona, kinse në fundin e sezonit trajneri i ardhur javë më parë, Gentjan Mezani, do të largohet nga klubi dhe ta lërë postin e kryetrajnerit dikujt tjetër”.

“SC Gjilani ju njofton se këto informata janë të pa vërteta dhe nuk qëndrojnë. Kryetrajneri i klubit, Gentjan Mezani, e ka besimin dhe mbështetjen e plotë të klubit”.

“Kjo nënkupton se spekulimet e bëra nëpër mediumet tona, janë për emra të përveçëm dhe për interesa të personave të caktuar, ndaj me anë të kësaj komunikate duam ti hedhim poshtë informatat e dalura sot nga disa mediume”, shkruan në njoftimin e klubit.

Ndryshe, Gjilani aktualisht zë pozitën e tetë të renditjes tabelore të ligës elitare kosovare me 35 pikë. /Telegrafi/