Një baba i katër fëmijëve nga Ukraina është arrestuar, pasi është filmuar nga kamerat e sigurisë duke e hedhur shkallëve të marketit vajzën e tij, vetëm pse ajo ishte grindur me vëllanë e saj.

Burri i identifikuar vetëm si Artem, 46-vjeç, është arrestuar nga policia pasi punonjësit e marketit i publikuan filmimet e kamerave të sigurisë në Facebook, transmeton Telegrafi.

Në video shihet 6-vjeçare, Anzhelika të cilën i ati e nxjerr nga një market në Rivne të Ukrainës, ku më pas e hedh poshtë shkallëve. Dhe është interesant se si babai kishte mohuar se kishte shtyrë të bijën shkallëve, kur punonjësi i marketit e akuzoi – duke u munduar të arsyetohet se ajo ishte penguar dhe më pas kishte rrëshqitur.

Megjithatë, kamerat e sigurisë e kanë dëshmuar të kundërtën, ku shihet qartë se si Artem e hedh shkallëve vajzën e tij e cila pak sekonda më herët ishte grindur me vëllanë brenda marketit.

E ajo çfarë ka habitur me shumë opinionin janë kalimtarët e rastit që nuk reaguan fare, e as që morën mundin për ta ndihmuar vogëlushen e gjorë. Nuk dihet nëse vajza e vogël ka pësuar lëndime trupore, ndërsa mediat lokale raportojnë se ajo ka pësuar vetëm disa mavijosje. /Telegrafi/