Festa e Kurban Bajramin mes rritjes së çmimeve të ushqimeve në botë

Rreth dy miliardë myslimanë anembanë botës festuan Kurban Bajramin, një nga festat më të mëdha të kalendarit islamik që përkon me ritet e fundit të pelegrinazhit vjetor të Haxhit.

Në disa vende, përfshirë Afganistanin, Iranin dhe shtetet e Azisë Qendrore, Kurban Bajrami u festua më 9 korrik. Por në pjesë të tjera të botës, duke përfshirë Pakistanin dhe Indonezinë, shtetin më të madh mysliman në botë, kjo festë u shënua më 10 korrik.

Shumë myslimanë festojnë festën katërditore duke therur bagëtinë [kurbanin] dhe duke e shpërndarë mishin mes të afërmve, fqinjëve dhe të varfërve.

Por, derisa lufta e Rusisë në Ukrainë i ka bërë çmimet e ushqimeve të rriten në mbarë botën, shumë njerëz thanë se nuk mund të përballonin therjen e bagëtisë, ritualin fetar për Kurban Bajram.

Në Afganistan, normalisht ka një nxitim për blerje të kafshëve para festës së Kurban Bajramit. Por këtë vit, rritja botërore e çmimeve të ushqimit dhe shkatërrimi ekonomik pas marrjes së pushtetit nga Talibanët e kanë bërë ritualin e therjes së kurbanit, të pamundshëm për shumë afganë.

Në Ukrainën lindore, dhjetëra myslimanë ukrainas u mblodhën më 9 korrik për të kremtuar Kurban Bajramin në xhaminë në Kostiantynivka, xhamia e fundit operacionale e mbetur në territorin e kontrolluar nga ukrainasit në Donbas.

Vetëm pak banorë vendas ishin të pranishëm, pasi lufta ka detyruar shumë të ikin në rajonet perëndimore të vendit. /REL/