Emiratet e Bashkuara Arabe “nuk po shqyrtojnë” asnjë tërheqje nga organizata të tjera shumëpalëshe në këtë kohë, pasi u tërhoqën nga karteli i naftës, Organizata e Vendeve të Naftës (OPEC), tha një zyrtar i Emirateve të Bashkuara Arabe për CNN të mërkurën.
Pas këtij veprimi, ka pasur spekulime se fuqia rajonale, Emiratet e Bashkuara Arabe, mund të tërhiqet nga organe të tjera kyçe, transmeton Telegrafi.
Por, i pyetur nëse Emiratet e Bashkuara Arabe do të tërhiqeshin nga organizata të tjera shumëpalëshe, zyrtari tha se vendi “po rishikon rëndësinë dhe dobinë e rolit dhe kontributit të tij në të gjitha aspektet”.
“Në këtë kohë, nuk po shqyrton asnjë tërheqje”, shtoi zyrtari.
Njoftimi i tërheqjes së OPEC përkoi me takimin e jashtëzakonshëm të Këshillit të Bashkëpunimit të Gjirit (GCC) në Xheda.
Zyrtari i Emirateve të Bashkuara Arabe i tha CNN se “seanca e djeshme ishte një hap i parë i mirë në drejtimin e duhur”, por shtoi se “ka ende shumë për të bërë në një sfond të pasigurt”.
Emiratet e Bashkuara Arabe janë anëtare të shumë organizatave rajonale dhe ndërkombëtare, duke përfshirë Organizatën e Bashkëpunimit Islamik (OIC) dhe Lidhjen e Shteteve Arabe. Është gjithashtu një aleat kyç i SHBA-së dhe ka lidhje në rritje me Izraelin. /Telegrafi/
