LAJMI I FUNDIT:

ELEFANTI I BARDHË

ELEFANTI I BARDHË

Nga: Nick Cave (“White Elephant”, albumi “Carnage”, 2001)
Përktheu: Fadil Bajraj

Gjuetari i bardhë rri ulur në verandën e tij
Me pushkën e tij për elefant dhe lotët e tij
Ai do t’ju qëllojë falas
Nëse afroheni atypari

Një protestues bie në gjunjë në qafën e një statuje
Statuja i thotë se nuk mund të marrë frymë
Protestuesi i thotë tash a e di se çfarë ndjenje është
Dhe e hedh në det

Unë jam Venera e Botticellit me penis
Duke kalëruar mbi një verore prej guaske
Jam një grua me shkumë deti që ngrihet nga spërkatja
Po vij të të bëj dëm
Me revole në pantallonat e mi të mbushur me lot elefanti
Dhe me nga një kalëdeti në çdo krah
Me pushkë elefanti prej lotëve
Do t’ju qëlloj të gjithëve falas
Bile edhe sall nëse ju shkon mendja të vini këtupari
Do t’ju qëlloj në fytyrën tuaj të hamamtë
Nëse ju shkon mendja të vini këtupari

Unë jam skulpturë akulli që shkrihet në diell
Unë jam skulpturë akulli me pushkë elefanti
Unë jam skulpturë akulli e bërë me lot në madhësi elefanti
Bie shi gazi dhe kripe mbi kokat tuaja
Presidenti ka thirrur federalët
Unë e kam planifikuar këtë prej vitesh
Do t’ju qëlloj në fytyrën tuaj të hamamtë
Nëse ju shkon mendja të vini këtupari
Do t’ju qëlloj bash për pikë të qejfit
Unë jam statujë e shtrirë në krah, në diell
Me kujtesën e një elefanti
Duke u tretur para syve tuaj
Duke u shndërruar në një re të madhe gri zemërimi
Duke sokëllirë kripën time mbi tokë
Do t’ju qëlloj të gjithëve falas
Nëse të shkon mendja veç të më shikosh

Një kohë po vjen
Një kohë është afër
Për mbretërinë
Në qiell

Mos pyet kush
Mos pyet pse
Është një mbretëri në qiell
Të gjithë po kthehemi në shtëpi
Për një kohë

Një kohë po vjen
Një kohë është afër
Për mbretërinë në qiell
Ne të gjithë po kthehemi në shtëpi
Për një kohë

Një kohë po vjen
Një kohë është afër
Për mbretërinë në qiell
Ne të gjithë po kthehemi në shtëpi
Pas një kohe