Edhe numri i Princeshës Latifa në mesin e të vëzhguarve përmes “Pegasus”

Numrat e telefonit të përdorur nga dy princeshat e Dubait thuhet se janë gjetur si pjesë e një hetimi në spiunimet e telefonave të njohur përmes programit Pegasus.

Sipas mediave të huaja, përcjell Telegrafi, bëhet fjalë për Princeshën Latifa që është vajza e sundimtarit të Dubait, dhe Princesha Haya Bint al-Hussain që është ish-gruaja e tij.

Në mes të shkurtit, BBC Panorama transmetoi një video sekrete nga Princesha Latifa në të cilën ajo tha se po mbahej si peng dhe kishte frikë për jetën e saj.

Ndërkohë Princesha Haya iku nga Dubai në vitin 2019 duke thënë se kishte frikë për jetën e saj.

Sidoqoftë, Emiratet e Bashkuara Arabe kanë mohuar të dy pretendimet e grave, shkruan BBC.

Lexo po ashtu Më shumë se 50,000 numra telefoni – si u vëzhguan përmes ‘Projektit Pegasus’ mbi 180 gazetarë dhe figura të ndryshme publike nga qeveritë autoritare në botë

Dhe numrat e tyre, vë në pah ky medium, janë me sa duket në një listë me rreth 50,000 numrash telefoni të njerëzve që besohet se janë me interes për klientët e firmës me bazë në Izrael, NSO Group.

Lista u zbulua nga mediat kryesore ndërkohë që zbulimi i numrave të telefonit të princeshave në listë – dhe atyre të disa të njohurve – ka ngritur pikëpyetje nëse ata mund të kishin qenë shënjestra e mundshme e një klienti qeveritar të grupit.

Lexo po ashtu Çfarë është Pegasus, “programi për spiunim” më i fuqishëm ndonjëherë dhe si funksionon ai?

Organizata e të drejtave të njeriut Amnesty International ka lëshuar një deklaratë duke pretenduar se gjetja implikon NSO Group “në katalogun e shkeljeve të të drejtave të njeriut” shkaktuar dy grave.

Andaj kjo organizatë ka bërë thirrje për rregullim për të kontrolluar “një industri të mbikëqyrjes së pakontrolluar”. /Telegrafi/