Drama shqipe po përballet me vështirësi, mungojnë librat teorikë

“Drama shqipe” ishte tema e diskutimit dhe një prej takimeve të shumta letrare e organizuar në edicionin e tretë të Panairit të Librit të Vjetër, të Rrallë dhe të Përdorur, mbajtur në “Art Qendër” të Fakultetit të Arteve të Bukura të Universitetit të Prishtinës ditën e shtunë.

Profesor Haqif Mulliqi dhe profesor Emin Z. Emini folën për zhvillimin e dramës shqipe dhe për periudhat e saj më të rëndësishme dhe të frytshme.

Mulliqi tha se për dramën shqipe më shumë flasin ata që s’e njohin sesa ata që e njohin, shkruajnë drama dhe interpretojnë drama. “Duhen mbajtur kësi takime, këso organizime, me profesorë të Fakultetit të Arteve Dramatike, për të ditur më shumë për dramën shqipe. Drama shqipe është e lidhur ngushtë me Teatrin Kombëtar. Dramat e para shqipe janë shkruar për t’u luajtur në teatër. Shkruhen edhe tash shumë, por jo të gjitha që shkruhen dhe botohen vihen në skenë. Disa, për shkak të teknikave dramatike të parelizuara mirë, nuk shfaqen në teatër. Ato, për t’u vënë në skenë, duhet të përpunohen”, tha Mulliqi.

Emini përmendi mungesën e literaturës teorike për dramën. Ai tha se ka dhjetëra libra në gjuhë të huaj për teorinë dhe praktikën e dramës, por ende nuk janë përkthyer në gjuhën shqipe, dhe studiuesve, studentëve, dramaturgëve, kujtdo që merret me studimin dhe shkrimin e dramës, u duhen shumë. “Drama shqipe, ashtu si kohë më përpara, edhe sot shkruhen shumë, por botohen pak. Ndoshta për shkak të cilësisë më të dobët. Në konkursin për dramën shqipe ‘Katarina Josipi’ çdo vit aplikojnë 20-30 dramaturgë. Një vit pas, një ose dy prej atyre dramave botohen. Asnjë më shumë. Çfarë na tregon kjo. Se cilësia e tyre mund të jetë e dobët. Dramaturgët shprehin pasiguri të botimit të tyre. E çfarë duhet bërë që ato drama të botohen dhe një ditë të vihen në skenë? Duhet të përpunohen. Drama është medium për publikun. Është medium skenik. Vendin e ka në teatër”, tha profesor Emini.

Në dy vitet e fundit juria për çmimet e dramës shqipe “Katarina Josipi” nuk e ka dhënë çmimin e parë, me arsyetimin se nuk ka pasur cilësi të mirë. Por me këtë arsyetim nuk u pajtuan profesorët Mulliqi dhe Emini, të cilët thanë se, edhe pse, ndoshta, nuk ka pasur cilësi të mirë, çmimet duhet të jepen sepse nëpërmjet tyre motivohen dramaturgët të shkruajnë drama.

Në këtë aktivitet morën pjesë edhe botues, shkrimtarë dhe studentë të dramaturgjisë, të cilët shprehën idetë e tyre për dramën e sotme shqipe.