Shkupi zyrtar thotë se nuk ndërpret negociatat me qeverinë teknikë në Sofje edhe pse në shtetin fqinj janë shpallur zgjedhje të tjera të parakohshme nga të cilat mund të dalë një qeveri politike. Megjithatë rezultatet nga këto negociata janë në “status quo”. Për muaj të tërë nuk ka asnjë lëvizje dhe asnjë arritje konkrete. Ministri i Jashtëm Bujar Osmani thotë se edhe BE-ja dhe SHBA-ja mbeten aktivisht të përkushtuar në gjetjen e një zgjidhjeje.

“Askush nuk mund të garantojë rezultat nga negociatat sepse për ne janë të rëndësishme pozitat tona ashtu si për Bullgarinë që janë të rëndësishme pozitat e saj. Punojmë me Bullgarinë në mënyrë bilaterale. Komunikimi është intensiv dhe i vazhdueshëm, në nivel të ekspertëve dhe të ministrive të jashtme dhe bëjmë përpjekje që gjatë kësaj periudhe që nuk ka Qeveri politike, të gjejmë mënyra për arritur zgjidhje të pranueshme për të dy palët”, tha Bujar Osmani, ministër i Jashtëm.

Skena politike në Bullgari pëson ndryshime nga dita në ditë, në kohën kur vendi është para zgjedhjeve të parakohshme parlamentare të 14 nëntorit, në të njëjtën ditë me zgjedhjet e rregullta presidenciale. Zgjedhjet janë të tretat me radhë brenda pak muajve dhe u ricaktuan pas tre përpjekjeve të dështuara për formimin e Qeverisë politike.

Sipas anketave më të fundit të Gallub për të cilën informojnë mediat bullgare, nëse zgjedhjet do të mbaheshin në fillim të shtatorit, GERB-UDF do të fitonte 22.5% të votave, BSP 16.1% dhe “Bullgaria Demokratike” 15.8%.

Megjithatë, rejtingu i ish ministrave të përkohshëm Kirill Petkov dhe Asen Vasilev është në rritje. Madje Petkov ka kaluar edhe ish kryeministrin Bojko Borisov. Rejtingu i Borisovit është më i ulëti në histori, 15.1% kurse ai i Petkov 33.8%. Me rejting më të lartë nga politikanët bullgarë është presidenti Rumen Radev me 65.5%.

Presidenti Radev një ditë më parë i dha përsëri pozitën e kryeministrit të përkohshëm gjeneralit të pensionuar Stefan Janev. Kabineti i përkohshëm i Janevit pësoi ndryshime nga përbërja paraprake vetëm në tre ministri.