Dillian Whyte rrëfen momentin kur Klitschko e kishte nokautuar Wilderin në stërvitje

Dillian Whyte ka rrëfyer për kohën kur ishte pjesë e kampit stërvitor të Wladimir Klitschkos, së bashku me Anthony Joshua dhe Deontay Wilder.

Legjenda ukrainase e boksit i angazhonte boksierët në ngritje për t’u përgatitur para dueleve të mëdha, ndërsa në të njëjtën kohë u mësonte atyre se si duhej të luftonin për të qenë më të mirët në kategorinë e peshave të rënda.

Whyte ka thënë për Sky Sports se asokohe, Klitschko e kishte nokautuar fuqishëm Wilderin, i cili aktualisht është i pamposhtur si profesionist dhe është kampion i WBC-së.

“E kam parë duke u nokautuar. Wladimiri e nokautoi. Ai e dinte se çfarë po ndodhte. I kishte duart lart. Po e godiste Wladin, duke e nxehur dhe dukej i tërbuar”.

“Nuk ishte thjesht rrëzim, ai u nokautua ftohtë. Madje edhe filloi të dridhej. Për këtë arsye, nuk kanë dashur që ai (Wilder) të përballej me Wladin, sepse Wlad do të ndeshej me të edhe si profesionist dhe Wilderit nuk i ka pëlqyer kurrë kjo ide”, ka deklaruar Whyte.

Joshua e mposhti Klitschkon me nokaut teknik në vitin 2017, Wilder vazhdon ta kërkojë duelin për unifikimin e titujve me AJ, ndërsa Whyte është në kërkim të një shansi për titull dhe të vetmen humbje ia ka shkaktuar pikërisht Joshua në vitin 2015. /Telegrafi/