Dhuratat e mirënjohjes: Artistët shqiptarë që pranuan dekorata presidenciale dhe ‘Çelësin e Qytetit’ gjatë vitit 2024

Bebe Rexha – Mirënjohje nga Presidentja Vjosa Osmani

Në një vizitë të veçantë gjatë muajit korrik 2024, artistja shqiptare Bebe Rexha, e njohur për sukseset ndërkombëtare, mori një mirënjohje të veçantë nga Presidentja e Kosovës, Vjosa Osmani.

Në shenjë respekti dhe mirënjohjeje për kontributin e saj të vazhdueshëm në promovimin e kulturës shqiptare në botë, Bebe Rexha u nderua me një varëse simbolike.

Ky objekt simbolizonte historinë e të mbijetuarve të dhunimit seksual nga forcat serbe, një nderim që thekson rëndësinë e bashkëpunimit të artit dhe historisë për ndihmën e shërimit kolektiv të Kosovës.

Grupi ODA dhe Dukagjin Lipa – Dekorata Presidenciale dhe Çelësi i Qytetit

Grupi muzikor ODA dhe Dukagjin Lipa, frontmeni i grupit dhe organizatori i festivalit Sunny Hill, u nderuan me dy mirënjohje të rëndësishme në vitin 2024.

Dukagjin Lipa mori dekoratën presidenciale nga Presidentja Vjosa Osmani dhe Çelësin e Qytetit të Prishtinës nga Kryetari Përparim Rama.

Këto nderime u dhanë për kontributin e Grupit ODA në pasurimin e kulturës muzikore të Kosovës, si dhe për promovimin e vendit përmes organizimit të festivalit Sunny Hill, i cili ka sjellë një vëmendje ndërkombëtare dhe është bërë një event i rëndësishëm në skenën globale të muzikës.

Ermonela Jaho me Kullën e Sahatit nga Erion Veliaj

Artistja shqiptare e njohur ndërkombëtarisht, Ermonela Jaho, u nderua gjatë vitit 2024 për kontributin e saj të jashtëzakonshëm në artin e operës.

Pasi performoi në një koncert të madh në Tiranë, ajo u prit nga Kryebashkiaku Erion Veliaj, i cili e ftoi të bëhet pjesë e aktiviteteve kulturore të Tiranës, veçanërisht për vitin 2025, kur Tirana do të shpallet Kryeqytet i Mesdhetarit të Kulturës.

Veliaj theksoi rolin e Ermonela Jahos si ambasadore e Shqipërisë moderne dhe kontribuese e artit global. Si një dhuratë simbolike, artistja mori mirënjohje të veçantë, duke përfshirë edhe një dedikim të veçantë për bashkëpunimin e ardhshëm.

Emina Çunmulaj me Plisin e Kosovës nga Përparim Rama

Modelja e njohur Emina Çunmulaj, gjatë një vizite në Kosovë, mori një dhuratë simbolike nga Kryetari i Prishtinës, Përparim Rama.

Në një takim ku mori pjesë edhe ish-Presidentja Atifete Jahjaga, Emina u nderua me plisin e Kosovës në filigram.

Ky akt simbolizoi lidhjen e fortë të Eminës me identitetin dhe traditat shqiptare, si dhe përkushtimin e saj për promovimin e kulturës shqiptare ndërkombëtarisht. Emina, e cila është konsulle e nderit e Shqipërisë në Florida dhe ka një rol të rëndësishëm në organizatën Pan-shqiptare Vatra, ka ndihmuar gjithashtu në ndërtimin e urave bashkëpunimi mes artistëve nga Kosova dhe Shtetet e Bashkuara të Amerikës.

Shkurte Fejza – Çelësi i Qytetit të Tiranës nga Erion Veliaj

Këngëtarja e njohur shqiptare Shkurte Fejza u nderua me “Çelësin e Qytetit të Tiranës” nga Kryetari Erion Veliaj.

Ky nderim erdhi vetëm pak ditë para koncertit të saj të madh për nder të 50-vjetorit të karrierës, i cili u mbajt në Sallën e Kongreseve në Tiranë.

Shkurte Fejza, një nga emrat më të njohur në skenën muzikore shqiptare, e priti këtë mirënjohje me shumë emocione, duke shprehur falënderimin e saj për nderimin e bërë, ndërsa theksoi se ky ishte një realizim i ëndrrës së saj rinore për Shqipërinë.

Sabri Fejzullahu – Çiftelia e Gravuar në Filigram nga Albin Kurti

Këngëtari i njohur i muzikës popullore, Sabri Fejzullahu, festoi ditëlindjen e tij të 77-të me një nderim të veçantë nga Kryeministri i Kosovës, Albin Kurti.

Në këtë rast simbolik, Kurti i dhuroi Sabri Fejzullahut një çifteli të gravuar në filigram, një dhuratë që simbolizonte pasurinë kulturore të Kosovës dhe respektin për artin dhe muzikën popullore.

Sabri Fejzullahu, i njohur për karrierën e tij të gjatë dhe ndikimin në muzikën popullore të Kosovës, shprehu falënderimet e tij për këtë nderim, duke e konsideruar si një simbol të bashkëpunimit dhe dashurisë për kulturën e tij. /Telegrafi/