Dëshironi të humbni peshë? Koha më e mirë për të ushtruar për eliminimin e yndyrës

Qoftë në mëngjes apo në mbrëmje, të shkuarit në palestër nuk është diçka që duhet ta anashkaloni. Megjithatë, koha e ditës kur ushtroni mund të jetë e rëndësishme, në varësi të rezultateve që dëshironi të arrini.

Një studim amerikan me 5.285 të rritur të moshës së mesme zbuloi se stërvitja midis orës 7:00 dhe 9:00 të mëngjesit, është koha më e mirë për të humbur peshë.

Dr. Rebecca Krukowski, një psikologe klinike me ekspertizë në menaxhimin e peshës (e cila nuk ishte e përfshirë në studim), ka thënë se kjo mund të ndodhte sepse fillestarët në palestër ishin në gjendje të përqendroheshin në stërvitjen e tyre, pa shpërqendrimin e punës ose e-mailit.

Analiza e botuar në revistën Obesity, tregoi se studiuesit përdorën të dhëna nga Anketa Kombëtare e Ekzaminimit të Shëndetit dhe Ushqimit të kryer nga Qendrat për Kontrollin dhe Parandalimin e Sëmundjeve nga viti 2003 deri në vitin 2006.

Pjesëmarrësit mbanin gjurmues fitnesi (të quajtur akcelerometër) në ijët e tyre, për të monitoruar stërvitjen për shtatë ditë rresht. Gjurmuesit janë vendosur në nyjat e dorës në studimet më të fundit të CDC, duke i bërë krahasimet më pak të besueshme.

Lexo po ashtu Nuk mund të keni bel të hollë për shkak të shprehisë së keqe të mbrëmjes

Ata punonin ose midis orës 7:00 të mëngjesit dhe 9:00 të mëngjesit, midis orës 11:00 dhe 13:00, ose në mbrëmje, nga ora 17:00 deri në 20:00. Studiuesit zbuluan se ata që shkonin herët në palestër kishin një indeks të masës trupore (BMI) dhe perimetër më të ulët të belit, sesa ata që ushtronin më vonë.

Autorët e studimit zbuluan se pjesëmarrësit në grupin e mëngjesit ishin joaktivë për një kohë më të gjatë pas stërvitjes, krahasuar me vizitorët e pasdites dhe të mbrëmjes në palestër. Por, pavarësisht kësaj, ende kishin një BMI më të ulët dhe perimetrin e belit.

“Ky është një hulumtim i ri emocionues që është në përputhje me këshillat e zakonshme për përmbushjen e qëllimeve të ushtrimeve – domethënë, planifikojeni stërvitjen në mëngjes përpara e-maileve, telefonatave ose takimeve që mund t’ju shpërqendrojnë”, është shprehur Dr Krukowski, transmeton The Sun.

Megjithatë, duke qenë se ky është një studim i kryqëzuar, nuk dihet nëse njerëzit që ushtrojnë rregullisht në mëngjes mund të ndryshojnë sistematikisht nga ata që ushtrojnë në kohë të tjera, në mënyra që nuk maten në këtë studim.

“Për shembull, njerëzit që ushtrojnë rregullisht në mëngjes mund të kenë orare më të parashikueshme, si p.sh. kanë më pak gjasa të jenë punonjës me turne ose më pak të ngjarë të kenë përgjegjësi përkujdesjeje që ndërhyjnë në ushtrimet e mëngjesit. Oraret e parashikueshme mund të kenë efekte të tjera të dobishme në peshë që nuk janë matur në këtë studim, si gjatësia dhe cilësia e gjumit dhe nivelet e stresit”, ka vazhduar doktoresha.

Studimi i mbështet hulumtimet e mëparshme nga shkencëtarët në Institutin Karolinska në Suedi dhe Universitetin e Kopenhagës në Danimarkë, të cilët sugjerojnë se ushtrimet më herët gjatë ditës mund ta rritin shkallën me të cilën trupi ynë djeg yndyrën.

Shkencëtarët e përfshirë në studim thanë se gjetjet tregojnë se stërvitja në mëngjes mund të jetë më efektive sesa stërvitja vonë në mbrëmje për sa i përket nxitjes së metabolizmit dhe djegies së yndyrës.

Lexo po ashtu Ushtrimet e forcës e mundin kokëdhimbjen

Megjithatë, Dr. Greg Potter – ekspert i orës së trupit dhe drejtues i podcastit Reason & Wellbeing – konsideron se niveli maksimal i performancës është zakonisht në orët e vona të pasdites.

“Jo vetëm që performanca është më e madhe në këtë kohë, por edhe ushtrimet e pasdites mund të jenë më të mira për kontrollin e sheqerit në gjak”, ka shpjeguar ai.

Ndërsa një studim i vitit 2022 i udhëhequr nga profesori Paul J Arciero (nga Skidmore College në New York) zbuloi se koha optimale e ditës për të ushtruar mund të ndryshojë në varësi të gjinisë.

Sipas tij, femrat që duan ta humbin yndyrën rreth barkut dhe ijëve, do të bënin më mirë të shkonin në palestër në mëngjes, por ato që kërkojnë të fitojnë forcë në pjesën e sipërme të trupit ose thjesht ta përmirësojnë gjendjen e tyre, mund të shohin më shumë rezultate nga ushtrimet në mbrëmje. Në bazë të rezultateve, e kundërta vlente për meshkujt. /Telegrafi/