Citroën tërheq reklamën e diskutueshme në Egjipt

Sipas aktivistes për të drejtat e grave, Reel Abdellatif, Citroën inkurajoi ngacmimet seksuale me reklamën.

Prodhuesi francez i automjeteve Citroën tërhoqi një reklamë të diskutueshme në Egjipt pasi kompania u përball me akuzat për promovimin e ngacmimit seksual të grave.

Reklama ka qarkulluar në rrjetet sociale të vendit që nga fillimi i dhjetorit dhe tregon këngëtarin e njohur në botën arabe Amr Diab, i ulur në një Citroën.

Një sekuencë e shkurtër tregon se si ai përdor një kamerë të instaluar në pasqyrën e pasme për të bërë një foto të një gruaje që kalon rrugën para tij – pa dijeninë ose pëlqimin e saj.

Dhe 60-vjeçari më pas buzëqesh kur fotografia shfaqet në telefonin e tij.

Në rrjedhën e mëtejshme të reklamës mund të shihni se si të dy njihen dhe afrohen me njëri-tjetrin gjatë një xhiroje së bashku.

Bërja e fotografive pa pëlqim “e frikshme”

Në rrjetet sociale, Citroën hasi kritika të ashpra. Në Egjipt, 90 për qind e grave midis moshës 18 dhe 39 vjeç raportojnë se kanë përjetuar ngacmime. Është “e frikshme” të fotografosh një grua pa pëlqimin e saj, ka shkruar aktivistja për të drejtat e grave Reel Abdellatif në shërbimin e internetit Twitter.

“Ata inkurajojnë ngacmimet seksuale”, shtoi ajo, duke iu drejtuar prodhuesit francez të automjeteve.

Citroën më në fund tha të enjten se kompania ishte informuar se një skenë nga reklama ishte “perceptuar si e papërshtatshme”. Versioni përkatës është tërhequr. “I kërkojmë falje të gjithëve që ndihen të ofenduar”. /Telegrafi/