Çitaku: Qytetarët e Prizrenit kanë folur, për keqardhje që LVV po e refuzon vullnetin e tyre

Nënkryetarja e Partisë Demokratike të Kosovës, Vlora Çitaku ka reaguar pasi dega në Prizren e Lëvizjes Vetëvendosje po kërkon që të ketë hetime në lidhje me procesin e votimit në garën e balotazhit, pasi siç thonë ata ka pasur presione ndaj votuesve.

Përmes një postimi në Facebook, Çitaku ka thënë se është për keqardhje që LVV-ja po refuzon vullnetin e qytetarëve.

“Qytetarët e Prizrenit kanë folur, vota e tyre është numëruar, dhe rezultati si i tillë duhet pranuar. Për keqardhje që Lëvizja Vetëvendosje po e refuzon vullnetin e qytetarëve”, shkruan Çitaku.

Ndryshe, përmes një reagimi në Facebook, nga LVV në Prizren kanë njoftuar e janë në përpilim të ankesave.

“Shtabi ynë zgjedhor është në përpilim të ankesave, bazuar në ngjarjet që kanë ndodhur në ditën e votimit. Sipas dëshmive ka pasur presione ndaj votuesve në hyrjet e vendvotimeve, tendencë për ndryshimin e vullnetit qytetar në javën e fushatës përmes shpërndarjes së parave dhe të mirave materiale, por edhe kërcënime ndaj komuniteteve në Prizren dhe në disa regjione të Prizrenit”, thuhet në reagim.

Lexo po ashtu LVV në Prizren kërkon hetime për procesin e votimit në balotazh: Ka pasur presion ndaj votuesve në hyrje të vendvotimeve

Tutje ata shtojnë se “Vonesa e raportimit të rezultateve nga disa vendvotime, ku pjesëmarrja deri në orët e vona ka qenë shumë e ultë dhe pastaj kemi pasur një rritje të madhe të numrit të votuesve si dhe dëshmitë për nënshkrimet e votuesve të cilët nuk kanë qenë në Kosovë në ditën e votimit jep indikacione që është devijuar vullneti qytetar”.

“Kërkojmë nga organet kompetente të hetuesisë që të gjitha këto raste të hetohen dhe që të verifikohen nënshkrimet në librin e votuesve. Përfundimisht raportimet e qytetarëve për ditën e zgjedhjeve dhe për procesin zgjedhor, lënë hapësirë për shumë dyshime që duhet të hetohen nga organet kompetente”, thuhet në reagim. /Telegrafi/