Çfarë nuk u shkon në mendje miliarderëve: Përveçse ngjyrosja e rrugëve, në Katar do të instalohen kondicionerë në hapësira të hapura!

Temperaturat në Katar – një nga vendet më të nxehta në Tokë – janë rritur aq shumë sa që autoritetet kanë instaluar kondicionerë në hapësira të hapura, përfshirë në rrugë dhe tregje të jashtme.

Sipas mediave të huaja, përcjell Telegrafi, vendi, ku temperaturat e verës tani arrijnë deri në 46C, tashmë ka filluar instalimin e kondicionerëve në stadiumet e futbollit në përgatitje të Kupës së Botës në 2022.

Por, ftohësit gjigantë janë instaluar gjithashtu përgjatë trotuareve dhe madje edhe në qendrat tregtare në natyrë, kështu që një fllad i ftohtë lejon që jeta të vazhdojë si më parë.

Gjithashtu, është bërë e ditur se rrugët në kryeqytetin e Katarit, Doha, janë ngjyrosur me ngjyrë blu, sepse ngjyra thith më pak nxehtësi sesa ngjyra e zezë, kështu që sipërfaqja mbetet më e freskët për më gjatë.

Lexo po ashtu Shtatori i këtij viti ishte muaji më i nxehtë ndonjëherë – temperatura të tilla ishin regjistruar vetëm në vitin 1880

Por instalimi i kondicionerëve në natyrë po vlerësohet si pjesë e një “cikli të egër”, pasi energjia elektrike që i vë në lëvizje ata është nga karburantet fosile – të cilat lëshojnë edhe më shumë dioksid karboni në atmosferën që po shkakton emergjencën e klimës.

Katari, i cili është vendi më i madh për frymë që lëshon gazra të tilla, sipas Bankës Botërore – gati tre herë më shumë se Amerika dhe pothuajse gjashtë herë më shumë se Kina – përdor rreth 60 për qind të energjisë elektrike të tij për ftohje.

Kështu, kapaciteti i përgjithshëm i ftohjes së vendit dhe emetimet – pritet të dyfishohen gati në 2030 nga niveli i vitit 2016, sipas Konferencës Ndërkombëtare të Ftohjes dhe Ngrohjes së Qarkut.

Gjithsesi, “në zonat me rritje të shpejtë urbane në të gjithë Lindjen e Mesme, disa qytete parashikojnë që të bëhen të pabanueshme”, tha Mohamed Ayoub, drejtor i lartë kërkimor në Institutin e Kërkimit të Mjedisit dhe Energjisë në Katar.

“Ne po flasim për rritje 4 – 6 gradë Celsius në një zonë që përjeton tashmë temperaturë të lartë”, tha z. Ayoub. /Telegrafi/