Breivik humbet çështjen kundër shtetit për kushtet e burgut

Ekstremisti norvegjez i ekstremit të djathtë Anders Behring Breivik, i cili vrau 77 persona në një sulm me bomba dhe të shtëna në vitin 2011, humbi të enjten përpjekjen e tij të dytë për të paditur shtetin për atë që ai pretendoi se ishte shkelje e të drejtave të tij njerëzore.

Breivik, i cili ndryshoi emrin e tij në Fjotolf Hansen, është mbajtur në izolim që kur filloi të vuante dënimin me burg në vitin 2012.

Ai argumentoi se kjo përbënte dënim çnjerëzor sipas Konventës Evropiane për të Drejtat e Njeriut, shkruajnë mediat e huaja, përcjell Telegrafi.

Gjykata e Qarkut në Oslo hodhi poshtë kërkesën e tij kundër Ministrisë Norvegjeze të Drejtësisë.

“Breivik ka kushte të mira fizike burgu dhe liri relativisht të madhe në jetën e përditshme”, tha gjykatësja Birgitte Kolrud në vendim.

“Ka pasur një përmirësim të qartë në kushtet e dënimit” dhe nuk kishte “asnjë dëshmi të dëmtimit të përhershëm nga dënimi”, shtoi ajo.

Vendimi u apelua menjëherë nga Breivik, tha gazeta norvegjeze Aftenposten.

Avokati i qeverisë, Kristoffer Nerland, tha se ishte “shumë i kënaqur” me gjetjen e gjyqtarit, por avokati i Breivik, Øystein Storrvik, nuk u pajtua me vendimin e gjykatës. /Telegrafi/