LAJMI I FUNDIT:

Biznesmeni izraelit Itai Green: Kosova ka potencial të madh për t’u zhvilluar, do t’i sjellim praktikat më të mira

Itai Green, themelues dhe shef ekzekutiv i Innovate Israel gjatë intervistës në Telegrafi | Foto: Ridvan Slivova/Telegrafi

Themeluesi dhe shefi ekzekutiv i Innovate Israel, Itai Green ka thënë se Kosova ka potencial të madh për t’u zhvilluar.

Green në një intervistë për Telegrafin është shprehur se janë të gatshëm që t’i sjellin në Kosovë njohuritë nga praktikat më të mira prej 500 korporatave që kërkojnë risi në mënyrë aktive në Izrael.

“Mendoj se për Izraelin është shumë e rëndësishme që të bashkëpunojë me partnerët e vendeve të tjera. Ne si izraelitë, këtë e shohim mundësi e madhe dhe reciproke. Po ashtu, mendoj se mund të mësojmë shumë nga ju. Sapo dëgjova kryeministrin [Albin Kurti], ishte shumë frymëzues. Izraeli mund të ndajë me ju disa nga njohuritë, veçanërisht kur bëhet fjalë për inovacionin, teknologjinë informative dhe arsimin. Ju jeni një vend shumë i ri, sapo mësova se mosha mesatare është 31 vjeç dhe mendoj se keni potencial të madh”, tha Green.


Ai ka shtuar se sfida për vitin 2022 është krijimi i partneritetit ndërmjet dy vendeve.

“Sfida e vitit 2022 është të bashkëpunosh, pra të jesh partner. Sa më shumë bashkëpunim do të bëni me bizneset fillestare dhe atyre izraelite. Do të rritni shpejtë vlerën, kjo është pikërisht ajo që vendet e tjera gjejnë në Izrael, kjo është ajo që do të ofrojnë për ju dhe mendoj se është reciproke. Ju mund të merrni njohuri në bujqësi, në shëndetësi, në tregti elektronike, në kibernetikë, në turizëm, në financa, në sigurime dhe në fusha të tjera. Ka shumë për të ofruar”, ka shtuar ai.

Green, i cili ishte pjesëmarrës në Samitin e Ballkanit që është mbajtur në Prishtinë, thekson se nga viti 2019 në Izrael në çdo bankë është e detyrueshme të ketë të paktën një anëtar bordi me përvojë në inovacion dhe teknologji.

“Në Izrael, që nga viti 2018, në çdo bankë është e detyrueshme të ketë të paktën një anëtar bordi me përvojë në inovacion dhe teknologji. Është e thjeshtë për t’u bërë. Kam biseduar me kryeministrin dhe mendoj se ai mund t’ia dalë brenda javës”, përfundon Green.

Intervista e plotë

Telegrafi: Tashmë janë bërë dy vite kur Kosova dhe Izraeli kanë krijuar marrëdhënie diplomatike. Si e shikon këtë marrëdhënie ndërmjet dy vendeve?

Itai Green: Mendoj se për Izraelin është shumë e rëndësishme që të bashkëpunojë me partnerët e vendeve të tjera. Ne si izraelitë, këtë e shohim mundësi e madhe dhe reciproke. Po ashtu, mendoj se mund të mësojmë shumë nga ju. Sapo dëgjova kryeministrin [Albin Kurti], ishte shumë frymëzues. Izraeli mund të ndajë me ju disa nga njohuritë, veçanërisht kur bëhet fjalë për inovacionin, teknologjinë informative dhe arsimin.

Ju jeni një vend shumë i ri, sapo mësova se mosha mesatare është 31 vjeç dhe mendoj se keni potencial të madh.

Telegrafi: Duke pasur parasysh zhvillonin ekonomik dhe teknologjik që ka Izraeli, na tregoni si mund të krijohet lidhja me Kosovën për shfrytëzimin e këtyre potencialeve?

Itai Green: Ka shumë për të mësuar nga vendet e tjera, të cilat tashmë fitojnë vlerë nga partneriteti me Izraelin. Në Izrael kemi mbi 500 kompani shumëkombëshe që kërkojnë në mënyrë aktive risi e që duhet të jetë arsyeja për këtë. Të gjitha ato kompani të menaxhuara nga njerëz shumë të zgjuar dhe kanë potencial të madh në Izrael, në aspektin e inovacionit dhe vazhdimisht në kërkim të inovacionit të radhës për gjënë më të mirë, sepse gjërat po ndryshojnë kaq shpejt.

Mendoj se fitojmë shumë praktika se si ta bëjmë atë siç duhet, si ta integrojmë teknologjinë në qeveri dhe në kompanitë e mëdha. Quhet ‘Inovacioni i Hapur’ që është të kuptosh se njerëzit më të zgjuar në mbarë botën nuk po punojnë për ty. Ata nuk funksionojnë për Amazonin ose për Googlein, është një metodë statistikore që njerëzit më të zgjuar zakonisht punojnë për dikë tjetër.

Sfida e vitit 2022 është të bashkëpunosh, pra të jesh partner. Sa më shumë bashkëpunim do të bëni me bizneset fillestare dhe atyre izraelite. Do të rritni shpejtë vlerën, kjo është pikërisht ajo që vendet e tjera gjejnë në Izrael, kjo është ajo që do të ofrojnë për ju dhe mendoj se është reciproke. Ju mund të merrni njohuri në bujqësi, në shëndetësi, në tregti elektronike, në kibernetikë, në turizëm, në financa, në sigurime dhe në fusha të tjera. Ka shumë për të ofruar.

Pasi të vendosni të adoptoni risi nga jashtë, atëherë do të bëni shumë për vendin tuaj.

Itai Green nga Innovate Israel gjatë intervistës në Telegrafi | Foto: Ridvan Slivova/Telegrafi

Telegrafi: Kosova ka një rini të edukuar. Cilat do të ishin këshillat e juaja për ta, në krijimin e mundësive?

Itai Green: Aktualisht sfida në arsim është sjellja e njohurive te studentët me anë të internetit. Ka mjaftë softuerë që të rinjtë mund të marrin njohuri nga to dhe ka mjaftë të tillë në Izrael.

Në disa universitete në Izrael ku studentët duhet të ndjekin kurse për ndërmarrësi dhe nëse e bëni këtë do të keni më shumë ndërmarrës, ngase jeni dygjuhësh, mjaftë të zgjuar e të arsimuar.

Ju duhet vetëm të sillni edukimin te njerëzit, duke filluar nga kopshti, shkolla fillore, por edhe në universitete, kështu që duhet ta bëni se çdo student duhet të ndjekë të paktën një kurs për ndërmarrësinë.

Më besoni, ata do të themelojnë biznese të reja, do të tërheqin investitorë dhe kjo është një mënyrë për të sjellë me të vërtetë prosperitet për brezat e rinj.

Telegrafi: Çfarë mund të ofroj “Innovate Israel” për Kosovën?

Itai Green: Ne mund të sjellim njohuritë nga praktikat më të mira prej 500 korporatave që kërkojnë risi në mënyrë aktive në Izrael. Ne e dimë saktësisht se cila prej tyre bën dhe cila jo dhe kjo është arsyeja për këtë. Ne mund t’ju ofrojmë mënyrën për ta bërë atë siç duhet.

Në Izrael, që nga viti 2018, në çdo bankë është e detyrueshme të ketë të paktën një anëtar bordi me përvojë në inovacion dhe teknologji. Është e thjeshtë për t’u bërë.

Kam biseduar me kryeministrin dhe mendoj se ai mund t’ia dalë me këtë brenda javës. Vetëm imagjinoni, në çdo kompani në Kosovë të ketë të paktën një anëtar bordi me përvojë të fortë në inovacion dhe teknologji, kjo do të ndryshojë dialogun përreth. Kjo do të sjellë mënyra të reja, ide të reja, biznese të reja, teknologji të reja dhe kjo do t’i bëjë gjërat të ecin më shpejt. Me këtë shembull të thjeshtë nga Izraeli, unë mendoj se ju mund t’ia dilni në Kosovë dhe t’i merrni super-shpejtë vlerat e kësaj. /Telegrafi/

Në trend Ekonomi

Më shumë
Hapja më e re e pikës së grumbullimit të pemëve dhe perimeve - Fresco Group

Hapja më e re e pikës së grumbullimit të pemëve dhe perimeve - Fresco Group

frescoexclusive
I madhi, gjiganti Master Potato ju prezanton katër shijet e tij!

I madhi, gjiganti Master Potato ju prezanton katër shijet e tij!

Atlantik GROUP SHPK
BKT Kosova nderohet me çmimin Banka më e mirë Digjitale në Kosovë nga Euromoney

BKT Kosova nderohet me çmimin Banka më e mirë Digjitale në Kosovë nga Euromoney

BKT
N’Itali me IP Petrol

N’Itali me IP Petrol

IP Petrol
Shtesat e reja për fëmijë merren nga gushti, ministri Murati tregon se në skemë është një nënë me 10 fëmijë

Shtesat e reja për fëmijë merren nga gushti, ministri Murati tregon se në skemë është një nënë me 10 fëmijë

Ekonomi
Mjeku në shtëpi mundësuar nga

Mjeku në shtëpi mundësuar nga "KosovaMed" ofron mbështetje shëndetësore për të moshuarit në shtëpi

KosovaMed Healthcare
Kalo në kategori