Bizantologu gjerman Peter Schreiner ka marrë pjesë në Kuvendin Ndërkombëtar të Albanologjisë me një studim për atë që e quan “Historia e një thesari shqiptar, Ungjilli i Korçës”. Studimi i tij ka në vëmendje kodikun nr. 93 të Korçës dhe ecejaket e tij shekullore.

Schreiner tha se bëhet fjalë për “një dorëshkrim që është greko-bizantin e që gjendet prej të paktën tre shekujsh në territorin shqiptar. Është gjetur në Korçë dhe është dorëshkrim i rëndësishëm sepse ka miniatura të shekullit X dhe është shkruar në fillim të periudhës më të rëndësishme të historisë kulturore bizantine, që është shekulli i perandorit Kostandin Porfirogjenti”.

Schreiner që ka qenë pedagog në Këln dhe president i shoqatës ndërkombëtare të studimeve bizantine, ka gjetur gjatë hulumtimeve të tij edhe zotëruesit e dorëshkrimit.

“Në fillim i përkiste një tregtari të pasur i cili ia shiti një manastiri të famshëm në Kostandinopojë, që e ruajti për tre shekuj. Më pas u tranportua prej aty në Epir, e paqartë se ku, por mendohet se ai i përkiste një koleksioni me dorëshkrime të rëndësishme në manastirin ku u ruajt. E quaj thesar sepse bën pjesë në këtë koleksion ungjijsh që janë gjetur në Korçë e që janë në Shqipërinë e sotme thesar të simbiozës mes kulturës bizantine e shqiptare mesjetare”.

Kodiku nr.93 i Korçës ruhet në Arkivin e Shtetit në Shqipëri. Schreiner beson se ky Ungjill i përkiste një tregtari të pasur shqiptar te shekujve të fundit që po ashtu e shiti, njësoj si tregtari i pasur i shekullit të dhjetë që e shiti atë duke kërkuar që dorëzimi në manastir të bëhej pas vdekjes së tij.

Schreiner sheh vlera artistike e historike në këtë dorëshkrim. /News 24/