Avokati Kërveshi: Aktgjykimi për Elezajn nuk mbështetet në asnjë provë, Apeli do t’i japë epilog meritor kësaj sage të drejtësisë

Kujtim Kërveshi, avokati i kryetarit të Klinës, Zenun Elezaj ka reaguar sot pas dënimit të Elezajt me katër mijë euro për punësimin e vajzës së tij.

Kërveshi në një postim në Facebook shkruan se ky aktgjykim i këtij trupi gjykues nuk mbështet në asnjë provë dhe as ky dënim me gjobë nuk është i pranueshëm sepse sipas tij, Elezaj nuk ka kryer veprën penale me të cilën është shpall fajtor.

Lexoni të plotë postimin e Kërveshit:

“Për gjitha palët e interesuara,

Jam njoftuar se trupi gjykues i Gjykatës Themelore ne Peje sot ka shpallur aktgjykim me të cilin klienti im, z Zenun Elezaj, Kryetar i Komunës se Klinës është shpallur serish fajtor, por tani me një dënim më të ulët, atë me gjobë prej 4000 euro.

As ky aktgjykim i këtij trupi gjykues nuk mbështet në asnjë provë, siç nuk është mbështetur as herën e pare kur z.Elezaj është shpallur fajtor, dhe edhe ky aktgjykim është në kundërshtim të plote tani edhe me sugjerimet e Gjykatës së Apelit e cila ka prishur aktgjykimin paraprak të këtij trupi gjykues dhe ka udhëzuar gjykatën e shkallës së parë se çfarë prova dhe dëshmi duhet të sigurohen.

Lexo po ashtu Kryetari i Klinës, Zenun Elezaj dënohet me 4 mijë euro për punësimin e vajzës së tij

Trupi gjykues në rigjykim i ka dëgjuar dy dëshmitarët sipas sugjerimit të Gjykatës së Apelit dhe dëshmitë e dy dëshmitareve kanë qenë shfajësuese për z Elezaj.

Si mbrojtës nuk mund ta pranoj standardin e vendosje së këtij trupi gjykues.

Për ne asnjë dënim, as ky me gjobë nuk është i pranueshëm sepse z.Elezaj nuk ka kryer veprën penale me të cilën është shpall fajtor dhe se jemi të bindur se Gjykata e Apelit do t’i jap epilog meritor kësaj sage të re të drejtësisë. /Telegrafi/