Njëzetegjashtë komuna të mërkurën dorëzuan padi ndaj Ministrisë së Arsimit dhe asaj të Shëndetësisë, për shkak të kontratës kolektive. Por kësaj padie të Asociacionit të komunave të Kosovës nuk iu bashkuan edhe katër komunat e udhëhequra nga Lëvizja Vetëvendosje, ajo e Podujevës, Kamenicës, Gjilanit dhe Shtimes.

Reklama

Kryetrari i Asociacionit, Sazan Ibrahimi përsëriti se dëmi për vitet e fundit konsiderohet të jetë 35 milionë euro.

“Sot komunat e Republikës së Kosovës do të deponojnë padi sa i përket çështjes së kontratave kolektive ndaj Ministrisë së Arsimit, Ministrisë së Shëndetësisë, ku vlera e dëmit në bazë të vlerësimeve të Asociacionit të Komunave të Kosovës e tejkalon shifrën prej 35 milionë euro. Synimi kryesor i komunave është që këto mjete financiare të kthehen në buxhetet komunale në mënyrë që të gjejnë zbatim në shumë projekte kapitale që shkojnë në të mirën e qytetarëve… Janë 26 komuna që sot do të dorëzojnë padi”, tha ai.

Reklama
Reklama

Megjithëse paralajmëroi se komuna të tjera mund të dorëzojnë padi, ai tha për KosovaPress se komunat që drejtohen nga Lëvizja Vetëvendosje nuk kanë shprehur interesim për të qenë pjesë e kësaj padie.

“Katër komunat ku Lëvizja Vetëvendosje ka shtrirje më të madhe sipas kontakteve deri dje që i kemi pasur nuk kanë shpreh interesim të jenë pjesë e kësaj padie për kthimin e mjeteve financiare”, tha Ibrahimi.