Juventusi ka marrë një fitore të madhe ndaj Veronës me rezultat 2-0, ku dy përforcimet e janarit shënuan gola.
Dusan Vlahovic dhe Denis Zakaria ishin autorët e golave për Zonjën e Vjetër, skuadër e cila rikthehet në top katërshe pas një kohe të gjatë.
Pas 24 xhirove, Juve ka 45 pikë, tetë më pak se Interi që është në pozitën e parë, por që ka një ndeshje më pak të zhvilluar.
Pa marrë parasysh entuziazmin e tifozëve bardhezi, trajneri Massimiliano Allegri ka thënë se skuadra e tij nuk është për titull.
“Ishte një ndeshje e vështirë sepse Verona vrapon shumë dhe na dëmtoi. Treshja në sulm punoi mirë, kanë shumë cilësi dhe kishim shumë raste. Duhet të jemi të qetë sepse kampionati është shumë i gjatë".
"Ishte e rëndësishme që të fitonim këtë ndeshje për të shfrytëzuar entuziazmin pas ardhjes së Vlahovic dhe Zakaria, si dhe për ti marrë pikë Atalantës në luftën për zonën e Ligës së Kampionëve. Titulli është një temë që i përket vetëm Interit, Milanit dhe Napolit”, u shpreh Allegri.
Trajneri italian ka folur edhe për dy prurjet e janarit, ku ka kritika për Dusan Vlahovic, pa marrë parasysh që shënoi gol.
“Unë do të hidhja në fushë gjithmonë lojtarët që kanë cilësi, por varet nga ndeshja dhe momenti i sezonit. Verona na sulmonte menjëherë, prandaj kishim nevojë për teknikë".
"Dusan nuk e nisi shumë mirë, gaboi në disa stopime. Është një lojtar që lufton, por duhet të përmirësohet. Zakaria luajti mirë dhe luftoi shumë”, përfundoi Allegri. /Telegrafi/
