Ai donte që ajo të martohej me një burrë që as nuk e njihte, arrestohet i dyshuari për vrasjen e vajzës së tij 18-vjeçare në Itali

Policia pakistaneze thotë se ka arrestuar një burrë i dyshuar për vrasjen e vajzës së tij 18-vjeçare në Itali.

Sipas mediave të huaja, përcjell Telegrafi, Shabbir Abbas u arrestua në fshatin e tij në provincën lindore Punjab, tha një zyrtar i lartë i policisë për Associated Press të premten.

Vajza e tij, Saman, u zhduk vitin e kaluar pasi thuhet se i është bërë presion për një martesë të rregulluar me një kushëri në Pakistan.

Ajo u pa për herë të fundit në prill të vitit 2021 nga fqinjët pranë shtëpisë së familjes së saj në Novellara, një qytet i vogël pranë qytetit të Reggio Emilia, në veri të Italisë.

Disa ditë më vonë, pamjet video nga aeroporti i Milanos treguan prindërit e saj duke pritur një aeroplan që po fluturonte për në Pakistan.

Para zhdukjes së saj, Saman Abbas i kishte thënë të dashurit të saj në Itali se prindërit e saj donin ta martonin me një burrë më të madh që nuk e kishte takuar kurrë, por ajo refuzonte.

Pasi kaloi disa muaj në një strehimore, ajo thuhet se u kthye në shtëpi pasi familja i dërgoi mesazhe me tekst.

Autoritetet italiane dyshojnë se 18-vjeçarja është vrarë dhe trupi i saj është varrosur.

Policia italiane javën e kaluar zbuloi mbetje njerëzore në një varr të cekët në një ndërtesë të braktisur pranë shtëpisë së familjes dhe po punon për identifikimin e viktimës.

Shabbir Abbas thuhet se u arrestua pas një njoftimi nga autoritetet italiane dhe tani po merret në pyetje nga hetuesit në kryeqytetin, Islamabad.

Një tjetër hetues i lartë i policisë pakistaneze tha se Abbas po kërkohej nga policia italiane me akuzën e vrasjes së vajzës së tij.

Italia ka arrestuar tashmë xhaxhain e Saman Abbas pas ekstradimit të tij nga Franca. Nëna e Samanit është ende në kërkim, ndërsa vëllai i saj i vogël është transferuar në një strehimore në Itali.

Pesë anëtarë të familjes do të dalin në gjyq në shkurt për rrëmbim, vrasje dhe fshehje të trupit. /Telegrafi/