Zyrtari i partisë së Vuçiqit: Qeverisja e SNS po e dërgon Serbinë në izolim ndërkombëtar

Zyrtari i lartë i Partisë Progresive Serbe (SNS), Dragan Shormaz tha se një ndryshim në politikën e jashtme, siç ka paralajmëruar presidenti Aleksandar Vuçiq, do ta çonte Serbinë në izolim dhe katastrofë ndërkombëtare.

Sipas Shormazit, politika e jashtme e Serbisë vazhdon të jetë e gabuar dhe se për këtë ka ngecje në integrimet evropiane.

“Dje, në Komisionin për Punë të Jashtme të Parlamentit Evropian na u tha qartë se nuk do të ketë vazhdim të integrimeve evropiane derisa të pajtohemi plotësisht me sigurinë dhe politikën e jashtme të Bashkimit Evropian”, tha Shormaz.

“Nëse zbatohet paralajmërimi i presidentit Vuçiq se Serbia do të respektojë reciprokisht integritetin territorial të vendeve që respektojnë integritetin e Serbisë, kjo do të na çojë në vetë-izolim, siç ishte në vitet 1990”, ka shtuar ai.

Lexo po ashtu Konflikt i Serbisë me NATO-n? Zyrtari i partisë së Vuçiqit akuzon ambasadorin rus: S'do të ndodh, vetëm një i çmendur e beson këtë

Siç raportojnë mediet serbe, ai pohon se në mënyrë që Serbia të shmangë këtë, duhet të vendosë menjëherë sanksione ndaj Rusisë dhe të aplikojë për anëtarësim në NATO.

Shormaz thekson se Serbia dhe Kosova do të duhet të zbatojnë marrëveshjet e Brukselit dhe Ohrit, sa më shpejt që të jetë e mundur.

“Detyra e politikanëve është të punojnë në interes të popullit. Nëse paralajmërimi i Vuçiqit për ndryshimin e politikës së jashtme zbatohet, por nuk mund të besoj se do të zbatohet, Serbia do të ndahet nga Evropa dhe SHBA-ja”, theksoi Shormaz.

Në fund, ai përkujtoi se me nënshkrimin e Marrëveshjes së Brukselit, Serbia është zotuar për një zgjidhje përfundimtare, ligjërisht obligative, me Kosovën. /Telegrafi/