Vuani nga migrena? Shtatë këshilla që mund t’ju ndihmojnë

Migrena nxitet kryesisht nga stresi, mungesa e mineraleve, cilësia e dobët e gjumit dhe faktorët ushqyes. Megjithatë, ka disa mënyra për t’i lehtësuar ato.

Në një artikull për CNN, Dr. Alexander Mauskop renditi gjërat që ua rekomandon më shpesh pacientëve të tij:

Duke bërë gjimnastikë

Ju duhet të ushtroheni të paktën tri herë në javë për 30 ose 40 minuta. Mauskop pretendon se ekziston një lidhje e drejtpërdrejtë midis stërvitjes dhe lehtësimit të migrenës. Ushtrimi është thelbësor nëse doni të ndiheni më mirë.

Praktikimi i ushtrimeve relaksuese

Terapia EMG‐BFB (‘biofeedback’ elektromiografik) mund të jetë e dobishme. Provoni gjithashtu joga dhe meditim. Ekspertët në fakt besojnë se të gjitha llojet e ushtrimeve relaksuese janë po aq efektive.

Orari i rregullt i gjumit

Shkoni në shtrat në të njëjtën kohë çdo natë. Ndiqni të njëjtin rregull kur bëhet fjalë për zgjimin në mëngjes, edhe kur është fundjavë. Si mungesa e gjumit ashtu edhe gjumi i tepërt mund të shkaktojnë migrenë.

Suplementet e magnezit

Simptomat e mungesës së magnezit në trup janë: migrena, duar dhe këmbë të ftohta dhe ngërçe të muskujve në këmbë. Në mënyrë ideale, duhet të konsumoni 400 miligramë magnez në ditë.

Shmangni ushqimet që janë nxitëse

Nëse pini një gotë verë dhe keni migrenë, atëherë vera është një nga shkaktarët dhe duhet të filloni ta shmangni atë. Ushqime të tjera që janë më shpesh problematike kur bëhet fjalë për migrenën janë: çokollata, monosodium glutamat (aditiv), ushqime plot me konservues dhe ëmbëltues.

Shmangni kafeinën

Pacientët shpesh nuk e kuptojnë se fajin e ka kafeina, megjithëse u ndihmon të ndihen më mirë. Realiteti është se vartësia ndaj kafeinës është ajo që u jep atyre migrenë. Ata pinë kafe, ndihen mirë për dy orët e ardhshme, por më pas vjen ferri.

Trajtimet parandaluese

Pyesni mjekun tuaj për opsionin më të mirë parandalues për ju, i cili mund të përfshijë beta-bllokues, antihipertensivë, antiepileptikë ose inhibues CGRP. /Telegrafi/