Vinicius i quan ‘kriminelë’ tifozët e Real Madridit të cilët kënduan kore raciste ndaj Lamine Yamal

Barcelona shënoi një fitore të madhe mbrëmjen e së shtunës në ‘El Clasico’ ndaj Real Madridit duke u shkëputur në gjashtë pikë si lider në La Liga.

Blaugranasit triumfuan me shifrat 4-0 në ‘Santiago Bernabeu’ falë dy golave të shënuar nga Robert Lewandowski dhe me dyshen Raphinha dhe Yamal që po ashtu gjetën rrjetën.

Sidoqoftë, një hije e zezë në këtë takim ishte fakti se disa tifozë të Real Madridit shprehën gjuhë urrejtje dhe racizëm ndaj disa yjeve të Barcelonës duke përfshirë edhe Lamine Yamal.

Lidhur me këtë rast tashmë ka reaguar edhe ylli i Real Madridit, Vinicius Jr, i cili ka dalë në mbështetje të lojtarëve të Barcelonës.

Reprezentuesi brazilian tha se është për të ardhur keq ajo që ndodhi në shkallët e stadiumit pas golit të Yamal.

“Është për të ardhur keq ajo që ndodhi dje në Bernabeu me koret raciste. Nuk ka vend për këta kriminelë në shoqërinë tonë”.

“E gjithë mbështetja ime shkon për Lamine, Ansu dhe Raphinha. E di që Madridi dhe policia do të bëjnë më të mirën për të identifikuar dhe ndëshkuar fajtorët”, ka shkruar Vinicius.

Ky është një gjest për t’u duartrokitur nga Vinicius, teksa kujtojmë se shpeshherë edhe vet ai ka qenë viktimë e racizmit në stadiumet e La Ligas./Telegrafi/

Lamentable lo que ha pasado ayer en Bernabéu con insultos racistas. No hay espacio para estos criminosos en nuestra sociedad. Todo mi apoyo a Lamine, Ansu y Raphinha. Lo sé que Madrid y la policia van hacer las cosas para identificar y punir los culpables!! https://t.co/pG2FXsMjDn

— Vini Jr. (@vinijr) October 27, 2024