Vdekja e foshnjës pas braktisjes në bodrum në Tiranë, arrestohet nëna 30-vjeçare

Policia e Tiranës ka arrestuar shtetasen Egljanta Isufi, 30 vjeç, e cila braktisi ditën e djeshme foshnjën e saj të porsalindur në një bodrum në lagjen Yzberisht.

Përmes një komunikate për media policia bën me dije se nëna e re akuzohet për veprën penale “Braktisja e fëmijëve të mitur”.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.

Foshnja e porsalindur u gjet nga një qytetar në ambientet e bodrumit mesditën e të mërkurës. Edhe pse u transportua me urgjencë në spital, ajo nuk i mbijetoi dot plagëve të marra dhe ndërroi jetë mëngjesin e kësaj të enjteje.

Lexo po ashtu Ndërron jetë foshnja e gjetur e braktisur në bodrumin e pallatit në Tiranë

Foshnja u lind nga 30-vjeçarja në ambientet e bodrumit dhe u braktis aty e sapo ardhur në jetë për shkak se ishte e pamartuar dhe prindërit nuk kishin dijeni për shtatzëninë.

“Në vijim të informacionit të dhënë ditën e djeshme, që bën fjalë për gjetjen e një foshnje të sapolindur, në bodrumin e një pallati në Yzberisht, ju informojmë se:

Specialistët për Hetimin e Krimeve të Komisariatit të Policisë Nr. 6 kanë arrestuar shtetasen E. I., 30 vjeçe, banuese në Tiranë, për veprën penale “Braktisja e fëmijëve të mitur”.

Ditën e djeshme, shërbimet e Policisë, së bashku me stafin mjekësor, kanë dërguar në spital, foshnjën e braktisur nga kjo shtetase, por pavarësisht ndihmës së menjëhershme të dhënë nga shërbimet e Policisë dhe stafit mjekësor, ditën e sotme foshnja ka ndërruar jetë”, njofton policia.