Vazhdojnë ankesat e pacientëve për mos trajtim të duhur (Video)

Në adresë të Telegrafit sot ka ardhur një video, ku një qytetar në Gjakovë thotë se në Emergjencën e Spitalit të Gjakovës nuk ishte i pranishëm asnjë mjek në kohën kur në njërën nga dhomat e këtij spitali po qëndronte një paciente për trajtim.

Në lidhje me këtë drejtori i Spitalit rajonal në Gjakovë “Isa Grezda”, Ahmet Asllani në një prononcim për Telegrafin ka thënë se nuk ka ndodhur asnjëherë që Emergjenca të qëndroj pa mjek.

Asllani theksoi se deri më sot nuk kanë marr asnjë ankesë të këtij lloji nga pacientët e spitalit.

“Në spital të gjithë mjekët janë prezent, si dhe teknikët. As për vitin 2018 as për 2019 nuk e kemi pasur asnjë ankesë. Në repartin e emergjencës  kontrollohen përafërsisht 100 pacientë brenda dite. Kujdestari, mjeku i përgjithshëm e  zakonisht thirren nëse ka nevojë kirurgu apo ortopedi…Në emergjencë kujdestaron një mjek specialistë i emergjencës dhe një nga grupi kirurgjik. Vetëm nëse ka pasur ndonjë rast të rëndë e që për dy-tre minuta ka mundur të jetë, se nuk e kemi pasur asnjë rast”, u shpreh ai.

Sipas tij, kjo ankesë është një tendencë për ta njollosur Emergjencën e spitalit, i cili është shpall një nga emergjencat më të mira në spitalet e Kosovës.

“Kurrë s’ka ndodh që këto reparte të qëndrojnë pa ndonjë mjek. Ato janë pallavra të pacientit, nëse dikush  me tendencë ka dashur që edhe atë mund të madh që e bëjmë po mundohen ta njollosin emergjencën. Por emergjenca jonë është shpall një nga emergjencat më të mira në spitalet e Kosovës”, ka thënë drejtori i spitalit rajonal të Gjakovës, Ahmet Asllani. /Telegrafi/