Liverpooli ka arritur fitore të madhe me rezultat 1-0 në udhëtim ndaj Interit në duelin e fazës së ligës në Ligën e Kampionëve.
Kjo pjesë e parë karakterizua nga intensitet i madh, episode dramatike dhe dy ndërhyrje të detyruara për vendasit, ndërsa VAR-i mori rolin kryesor në momentin më të rëndësishëm të kësaj pjese.
Interi e nisi ndeshjen me telashe. Që në minutën e 11-të, Hakan Çalhanoglu u detyrua të largohej nga fusha për shkak të një lëndimi, duke e detyruar trajnerin Cristian Chivu të aktivizojë Piotr Zielinskin.
Situata u përkeqësua sërish në minutën e 31-të, kur edhe Francesco Acerbi nuk ishte në gjendje të vazhdonte dhe vendin e tij e mori Yann Bisseck.
Liverpooli pati rastin më të mirë të fillimit të ndeshjes në minutën e 18-të. Curtis Jones goditi fort drejt këndit të poshtëm të majtë, por Yann Sommer reagoi shkëlqyeshëm me një pritje të jashtëzakonshme që mbajti Interin në lojë.
Momenti më i rëndësishëm i pjesës së parë ndodhi në minutat 32-36. Fillimisht, Hugo Ekitike goditi fuqishëm, Sommer devijoi topin, por vetëm deri te Ibrahima Konate, i cili e çoi topin në rrjetë me kokë, duke i dhënë Liverpoolit epërsinë 1-0.
Megjithatë, festa e “Të Kuqve” u ndërpre nga sinjali i VAR-it. Gjyqtari Felix Zwayer u thirr për rishikim për një prekje të dyshimtë me dorë në aksion, dhe pas konsultimit, ai anuloi golin, duke konfirmuar se episodi ishte i parregullt.
Interi provoi të reagojë në minutën e 40-të me një goditje dënimi të Nicolo Barellas, por topi kaloi ngjitur me shtyllën e majtë.
Pjesa e dytë nuk ishte aq e pasur sa i përket rasteve për gol, por një episod në minutën e 84-të ishte ai që vendosi takimin.
Alessandro Bastoni pasi tërhoqi Florian Wirtzin për fanelle brenda zonës, e detyroi gjyqtarin Zwayer të akordojë penallti pas rishikimit të aksionit në VAR.
I saktë nga penalltia ishte Dominik Szoboszlai i cili e mposhti Sommerin për t’i dhënë fitoren Liverpoolit me rezultat 1-0.
Pas kësaj fitoreje Liverpooli ngjitet në pozitën e tetë me 12 pikë, ndërsa Interi me po aq pikë renditet e pesta./Telegrafi/
