Ukraina ka një armë të re në luftën e saj kundër Rusisë – tanket gjermane të kohës së Luftës së Ftohtë të dizenjuara nga Porsche

Ukraina ka një armë të re në luftën e saj kundër Rusisë – tanket gjermane të luftës së kohës së Luftës së Ftohtë.

Sipas mediave të huaja, përcjell Telegrafi, bëhet fjalë për raportime sipas të cilave, Gjermania dërgoi 10 tanke Leopard 1A5 në Ukrainë muajin e kaluar.

Ajo u projektua nga Porsche – më e njohur për makinat luksoze – dhe u prodhua nga Krauss-Maffei në Gjermaninë Perëndimore.

Tanku Leopard hyri në shërbim në vitin 1965 dhe u vendos për herë të fundit nga ushtria gjermane në vitin 2000. Modeli 1A5 u zhvillua në vitet 1980.

Që atëherë, shumë prej tankeve gjermane janë ruajtur në depo në të gjithë Evropën derisa qeveria gjermane miratoi në shkurt që ato t’i dhuroheshin Ukrainës.

Dhe më shumë se 100 do të dhuroheshin pasi të rinovoheshin, raportoi The New York Times.

Pavarësisht moshës së tyre, ekspertët dhe zyrtarët gjermanë i thanë mediumit në fjalë se Leopard 1A5 mund të jetë një armë e dobishme.

Ushtaraku Andreas Marlow, i cili mbikëqyr programin stërvitor të Gjermanisë për ukrainasit, tha se modeli kishte aftësi shikimi natën dhe një sistem “stabilizimi” të armëve dhe, ndryshe nga shumë prej tankeve më të vjetër të betejës që përdoren në Ukrainë, mund të kthehej prapa.

Marlow theksoi se Leopard 1A5 ishte gjithashtu më i lehtë për t’u zotëruar, mirëmbajtur dhe rregulluar sesa pasardhësi i tij modern, Leopard 2A6.

“Në fund, nëse dikush është profesionist, nuk ka rëndësi sa vjeç është”, tha për Times një komandant tanku ukrainas i identifikuar vetëm nga shenja e tij e thirrjes, Bassist.

Ndërsa Christian Mölling, një ekspert ushtarak në Këshillin Gjerman për Marrëdhëniet me Jashtë, tha: “Ato tanke Leopard 1 nuk janë me të vërtetë një opsion i keq”.

Ndryshe, që nga shkurti, ekuipazhet e tankeve ukrainase janë trajnuar në Gjermani për të operuar Leopard 1A5 dhe sisteme të tjera të mëdha armësh që i janë dhuruar Ukrainës.

Siç raportohet më tej, ekuipazhet e tankeve stërviten gjashtë ditë në javë për gjashtë javë përpara se të kthehen në Ukrainë.

The Times raportoi se Gjermania kishte trajnuar 6,300 nga 10,000 trupat ukrainase që kishte planifikuar për vitin 2023.

Angazhimi i Gjermanisë ishte pjesë e një zotimi më të gjerë të BE-së për të trajnuar 30,000 ushtarë ukrainas deri në fund të vitit 2023, raportoi The Brussels Times. /Telegrafi/