Receta e ëmbëlsirës kërkon kohë për përgatitjen, por është mjaft e shijshme dhe delikate.

Një ëmbëlsirë ideale për t’u përgatitur për një festë ose për ndonjë rast tjetër special. Mos e lini pa provuar! –  transmeton Telegrafi.

Përbërësit e nevojshëm për kore:

– 6 të bardhë të vezëve,
– 6 lugë sheqer,
– 100 gramë kokos,
– 100 gramë arra të bluara (më mirë është të keni lajthi),
– 3 lugë mielli dhe pluhur për ëmbëlsira.

Përgatitja:

Tundni të bardhët e vezëve, shtoni sheqerin, kokosin, arrat, miellin dhe pluhurin e ëmbëlsirave dhe që të gjitha bashkë t’i përzieni dhe piqni në 180 gradë rreth 15 minuta.

Për fill nevojiten:

– 200 gramë ajkë të ëmbël,
– 100 gramë arra të bluara trashë,
– 100 gramë pemë të thata sipas dëshirës (të grira imët),
– 100 gramë sheqer.

Fërgoni pak arra në tigan, shtoni sheqerin dhe lini që të karamelizohen, pastaj shtoni edhe pemët e thata. Karamelen shtojani ajkës së ëmbël dhe sapo të vlojë përzierja hiqeni nga shporeti. Lëreni që përzierja të ftohet.

Për fillin e dytë nevojiten:

– 6 të verdhë të vezëve,
– 2 shtanglla çokollate të zezë,
– 200 gramë gjalpë,
– 6 lugë sheqer,
– 200 gramë ajkë të ëmbël.

Zieni të verdhët e vezëve dhe sheqerin dhe kremit të përftuar shtoni çokollatën derisa të shkrihet. Hiqeni nga shporeti dhe lëreni të ftohet.

Kur të ftohet shtoni gjalpin. Tundeni ajkën e ëmbël dhe bashkojani fillit të ftohur.

Vini koren e parë, pastaj fillin e parë, të dytin dhe në fund zbukurojeni tortën me çokollatën e grirë në rende ose me pak pluhur kakao.

/Telegrafi/