Apartamenti në Park Avenue në New York, të cilin ish-qeveria e ish-Jugosllavisë e bleu në vitin 1975, është për shitje, dhe çmimi fillestar i saj është 18 milionë dollarë.

Sipas asaj që shkruajnë mediat e huaja, përcjell Telegrafi, apartamenti është në dispozicion për blerësit potencialë që nga e hëna dhe paratë nga shitja e saj, sipas marrëveshjes për trashëgiminë, të ndahen nga ish-republikat e RSFJ-së.

Ky apartament thuhet se ishte përdorur dikur nga Presidenti Jugosllav, Josip Broz Tito, dhe ishte gjithashtu vendbanimi i delegacioneve jugosllave në OKB – që ofron një pamje panoramike të Nju Jorkut me tre ballkone.

Në dupleksin prej 418 metra katrorë askush nuk ka qëndruar për më shumë se 20 vjet dhe apartamenti aktualisht është në gjendje të shkatërruar.

Kjo shpjegon se pse agjencia që e shiti publikoi vetëm dy foto, tarracën dhe ndërtesën në të cilën gjendet apartamenti.

“Prona ka nevojë për rinovim të plotë për të përshtatur standardin e shekullit 21, sepse askush nuk i ka kushtuar vëmendje për dekada. Meqenëse punimet lejohen vetëm nga maji deri në shtator, pritet që projekti të zgjasë dy apo tre vjet dhe ndoshta më gjatë”, ka thënë Tristan Harper, një agjent i pasurive të patundshme.

Apartamenti ka pesë banjo dhe katër dhoma gjumi, si dhe një pjesë të këndshme me shkallë të gjerë që shpie në sallon me një tarracë dhe një kamin. Gjithashtu ka dhoma të veçanta për shërbim dhe lavanderi.

Siç thuhet më tej, më 1975, ambasadori jugosllav Jaksha Petriç pagoi në vlerë të 100 mijë dollarëve, për ta blerë atë.

Sipas avaz.ba, përveç këtij apartamenti, shtetet e dala nga ish-Jugosllavia pritet të marrin dhjetëra miliona euro nga shitja e ish ambasadave dhe rezidencave në Nju Jork, Bern, Tokio dhe Bon, dhe jo vetëm. /Telegrafi/