Takohet Grupi Koordinues për anëtarësimin e Kosovës në Këshillin e Evropës

Grupi i formuar për të drejtuar procesin e anëtarësimit të Kosovës në Këshillin e Evropës do të mbledhë sot anëtarët e tij në një takim të rëndësishëm koordinues.

Në këtë takim marrin pjesë zëvendësministri i Punëve të Jashtme dhe Diasporës, Kreshnik Ahmeti dhe nënkryetarja e Kuvendit të Kosovës, Saranda Bogujevci.

Vendimi për ngritjen e këtij Grupi Koordinues u mor nga kabineti qeveritar më 12 korrik të këtij viti, në vijim të propozimit të bërë nga Ministria e Punëve të Jashtme dhe Diasporës.

Kjo lëvizje pason hapat e mëparshëm të ndërmarrë nga Kosova më 12 maj 2022, kur zyrtarisht filluan procedurat e anëtarësimit në Këshillin e Evropës me dorëzimin e aplikimit në selinë qendrore në Strasburg.

Roli i Grupit Koordinues pritet të jetë kyç në nxitjen e kooperimit të brendshëm dhe të punojë në përgatitjen e një paraqitjeje të qartë dhe të koordinuar të progresit të Kosovës në fushat kritike si respektimi i të drejtave të njeriut, sundimi i ligjit dhe thellimi i demokracisë.