Suplementet që nuk duhet t’i merrni kurrë së bashku, sipas ekspertëve

Miliona njerëz në botë konsumojnë vitamina dhe suplemente për një shëndet sa më të mirë, por ekspertët paralajmërojnë se kombinimi i gabuar mund të shkaktojë pasoja serioze për shëndetin

Nga mungesat ushqyese deri te dëmtimet e organeve, ja disa kombinime që duhet të shmangni dhe si t’i menaxhoni ato.

Kombinimi më i rrezikshëm: Orizi me maja të kuqe dhe niacin

Këto suplemente, që shpesh përdoren për uljen e kolesterolit, mund të shkaktojnë dëmtim serioz të mëlçisë kur merren së bashku. Todd Sontag, specialist i mjekësisë, shpjegon se përfitimet për zemrën nga këto produkte janë të paqarta, ndërsa efektet anësore janë të dokumentuara. Nëse shtohen edhe statinat (medikamente për uljen e kolesterolit), rreziku për mëlçinë rritet ndjeshëm.

Omega-3 dhe ginkgo biloba: Probleme me qarkullimin e gjakut

Omega-3 është i njohur për përmirësimin e shëndetit të zemrës, ndërsa ginkgo biloba thuhet se ndihmon në parandalimin e demencës. Por, kur merren bashkë, këto suplemente mund të rrisin qarkullimin e gjakut në nivele të rrezikshme, duke shkaktuar humbje serioze gjaku në rast dëmtimesh. Ekspertët rekomandojnë t’i konsumoni me një hapësirë kohore prej të paktën dy orësh.

Kombinime që pengojnë përthithjen e njëra-tjetrës

Magnez dhe kalcium: Kur merren së bashku, këto minerale përthithen pjesërisht, ndërsa pjesa tjetër eliminohet nga trupi. Prisni të paktën dy orë midis konsumimit të tyre.

Zink dhe bakër: Sasia e tepërt e zinkut mund të pengojë përthithjen e bakrit, i cili është i rëndësishëm për prodhimin e qelizave të kuqe të gjakut dhe forcimin e kockave.

Vitamina A, D, E dhe K: Këto vitamina liposolubile duhet të merren të ndara për të shmangur “konkurrencën” gjatë përthithjes.

Hekuri dhe çaji: Një kombinim që duhet shmangur

Hekuri, thelbësor për prodhimin e qelizave të kuqe të gjakut, mund të mos përthithet siç duhet kur merret me çaj të zi ose jeshil. Taninat në çaj lidhen me hekurin, duke e bërë të padisponueshëm për trupin. Sigurohuni të shmangni konsumimin e këtyre dyjave njëkohësisht.

Suplementet për gjumë: Kujdes me mbidozën e qetësuesve

Melatonina dhe suplementet bimore si valeriana, ashwagandha, kava dhe Lule Basani mund të shkaktojnë përgjumje të thellë kur kombinohen. Kjo mund të rrisë rrezikun e reaksioneve të padëshiruara.

Suplementet dhe medikamentet:

Lule Basani dhe antidepresantët: Ky kombinim mund të çojë në nivele të rrezikshme të serotoninës, duke shkaktuar sindromën e serotoninës. Simptomat përfshijnë konfuzion, agjitacion, djersitje dhe në raste të rënda, konvulsione ose aritmi kardiake.

Hekuri dhe antibiotikët: Hekuri mund të ndërhyjë në efektivitetin e antibiotikëve, ndaj rekomandohet të konsultoheni me mjekun për kohën e marrjes së tyre.

Rekomandimi i përgjithshëm

Shumica e njerëzve mund të marrin të gjithë ushqyesit që i duhen përmes një diete të larmishme dhe të balancuar.

Nëse përdorni suplemente, ndiqni udhëzimet e ekspertëve për kohën dhe mënyrën e përdorimit për të shmangur efektet e padëshiruara. /Telegrafi/