Sulmi me granatë dore në shtëpinë e kryesuesit të Bordit të Trepçës, arrestohet personi i dyshuar

Prokuroria Themelore në Mitrovicë, ka njoftuar se ka arrestuar personin i cili dyshohet se javë më parë, hodhi granatë dore në oborrin e shtëpisë së kryesuesit të Bordit të Trepçës, Bahri Hyseni.

Deri tek arrestimi i të dyshuarit sipas Prokurorisë ka ardhur pas një hetimi intensiv.

“Pas një hetimi intensiv të kësaj prokurorie në bashkëpunim me policinë, është arrestuar personi i dyshuar me iniciale F.B., për shkak të veprave penale “Shkaktimi i rrezikut të përgjithshëm” etj.

I dyshuari me vendim të prokurorit është ndaluar me dyshimin e bazuar se ka sulmuar me granatë dore shtëpinë e kryesuesit të Bordit të Trepçës”, thuhet në njoftim.

Lexo po ashtu Mjet shpërthyes në oborr të shtëpisë së kryesuesit të Bordit të Trepçës, Bahri Hyseni

Ndaj personit të dyshuar brenda afatit të paraparë ligjor, do të paraqitet kërkesa për caktimin e masës së paraburgimit pranë gjykatës kompetente.

Mbrëmjen e 30 gushtit, shtëpia e kryesuesit të Bordit të Trepçës ishte sulmuar me një mjet shpërthyes.

Hyseni e kishte konfirmuar vetë lajmin për Telegrafin, duke thënë se nuk kishte pasur persona të lënduar.

“Mbrëmë, rreth orës 01:00 pas mesnate, në shtëpinë time është hedhur një granatë dore. Ne kemi qenë në shtëpi, për fat të mirë nuk kemi pas lëndime apo diçka, vetëm dëme materiale, një veturë e djalit është e dëmtuar dhe vetura ime”, kishte deklaruar Hyseni. /Telegrafi/