Spanjolli detyrohet ta paguajë ish-gruan e tij me mbi 200 mijë dollarë për shkak të ‘punëve të shtëpisë’

Një gjykatës spanjoll urdhëroi një burrë që t’i paguante ish-gruas së tij rreth 200 mijë euro (215,000) dollarë për “punët e shtëpisë” për një periudhë 25 vjeçare, punë të cilat ajo i kryente “ekskluzivisht” gjatë kohës që ata ishin bashkë.

Ivana Moral fitoi gjykimin pasi debatoi se ajo ishte e ngarkuar me punët për çiftin gjatë 25 viteve të martesës së tyre, sipas një raporti nga WSB, duke cituar gazetën në gjuhën spanjolle El Pais.

Gjykata urdhëroi ish-bashkëshortin e saj që t’i bënte pagesa mujore prej 492 eurove (528 dollarësh) Moral-it, një shumë që u përcaktua duke llogaritur pagën minimale profesionale mujore për pastruesit e shtëpive gjatë periudhës kur çifti ishte i martuar, shkruan FOX News, përcjell Telegrafi.

Moral i tha gjykatës se ajo ishte gjithashtu përgjegjëse për rritjen e dy vajzave të çiftit dhe për t’u kujdesur për burrin e saj gjatë martesës së tyre, por shtoi se pavarësisht kësaj arriti që të pastronte edhe shtëpinë.

Ish-gruaja argumentoi se “përkushtimi i saj ekskluziv ndaj shtëpisë dhe familjes” e la atë të paaftë për të ndjekur mundësitë e saj të karrierës, ndërsa ish-bashkëshorti i saj ishte në gjendje të ndërtonte një biznes të suksesshëm të “fitness-it” e gjithashtu “akumuloi dhe rriti në mënyrë eksponenciale asetet e tij”.

Moral gjithashtu deklaroi se 25 vitet e martesës së saj me ish-bashkëshortin e bënë atë që të ndjehej si “ekonomikisht e kërcënuar, e pavlerë dhe e varur prej të tjerëve”. /Telegrafi/