Sot protestojnë studentët e Ferizajt

Studentët e Organizatës studentore “Demokracia Studentore”, sot do të protestojnë kundër vendimit të kryetarit të Komunës së Ferizajt, Muharrem Svarqa, i cili sipas tyre, duke manipuluar me këshilltarët komunalë ka vendosur varrezat e qytetit pranë Universitetit të Shkencave të Aplikuara në Ferizaj.

Kryetari i Organizatës “Demokracia Studentore”, Mexhid Ramusa është shprehur se kryetari Muharrem Svarqa me veprimet e tij po tregon mizori dhe nuk ka një qëndrim të mirëfilltë për këtë problematikë shoqërore.

“Vendimi për të vendosur varrezat e qytetit pranë Universitetit të Shkencave të Aplikuara në Ferizaj, Sh.M.L ‘Qendra e Kompetencës’, Shkollës së Mesme Ekonomike, Sh.M.U ‘Vezir Jashari’, tregon se kryetari i Komunës po manipulon me shtresat shoqërore dhe po e varros një herë e përgjithmonë mundësinë për të investuar për Mensë dhe Konvikte në parcelën pranë Universitetit të Shkencave të Aplikuara në Ferizaj. Vendimi që është marrë është vendim i dyfishtë pasi që varrezat e qytetit janë të destinuara në Fshatin Balaj të Ferizajt dhe ky veprim i tij ka një botëkuptim politik dhe i cili është në dëm të studentëve, nxënësve dhe qytetarëve të Ferizajt . Me këtë vendim, gjithashtu po keqpërdoret edhe buxheti komunal i Ferizajt”, ka thënë ai.

Sipas një komunikate të kësaj organizate, për ta ndaluar këtë vendim mizor “Demokracia Studentore”, organizon protestë para Kuvendit Komunal në Ferizaj më 17 maj, në ora 11:00. Ata i kanë bërë thirrje shoqërisë civile, studentëve, nxënësve dhe të gjithë qytetarëve që të mblidhemi dhe ta kundërshtojmë një vendim, i cili siç thuhet është në dëm të të gjithëve.