Singapori do t’i stimulojë me para çiftet që të bëhen prindër gjatë pandemisë

Singapori do të ofrojë një pagesë për çiftet që mëtojnë të bëhen prindër gjatë pandemisë së coronavirusit.

Zëvendëskryeministri i vendit, Heng Swee Keat tha se stimulimi do të ndihmojë njerëzit që përballen me presionin financiar dhe janë të shqetësuar për punën e tyre, raporton CNN.

“Ne kemi marrë reagime se COVID-19 ka bërë që disa çifte të shtyjnë planet e tyre të prindërimit”, tha Keat.

“Kjo është plotësisht e kuptueshme, veçanërisht kur përballen me pasiguri me të ardhurat e tyre”, shtoi ai, transmeton Telegrafi.

Heng tha se pagesa do të ndihmonte prindërit rreth shpenzimeve, por nuk konfirmoi shumën se sa do të paguhen.

Singapori ka një nga nivelet më të ulëta të lindjeve në botë, një statistikë që qeveritë e njëpasnjëshme janë përpjekur ta përmbysin, por pa sukses.

Shkalla e lindshmërisë tani qëndron në vetëm 1.14 lindje për grua, sipas organit kombëtar të statistikave.

Kjo e vendos atë në nivelin me Hong Kongun, sipas Bankës Botërore. Vetëm Koreja e Jugut dhe territori amerikan i Porto Rikos kanë norma më të ulëta. /Telegrafi/