Shkëmb Manaj, kreu i ri i Shërbimit Civil në Kosovë: 632 ankesa më 2015, 170 shkelje nga institucionet!

Këshilli i Pavarur Mbikëqyrës për Shërbimin Civil të Kosovës , në mbledhjen e mbajtur më 20 qershor, me votim unanim e zgjodhi Shkëmb Manajn, kryetar të këtij këshilli.

Kreu i ri i KPMSHCK-së pranon se jo pak shkelje ndodhin në shërbimi civil në vend, por thotë se institucioni që do të udhëheq ai, në mënyrë të drejtë do të zgjedh të gjitha ankesat e shërbyesve civil – si në nivelin lokal, ashtu edhe në atë qendror.

“Ankesat kryesisht kanë të bëjnë me kontestime të konkursit. Për vitin 2015, sipas statistikave, rreth 25 për qind e ankesave të parashtruara nga kandidatët kanë të bëjnë me proceset e rekrutimit për vende të caktuara të punës, ku ata konsiderojnë se ka pasur shkelje në procedurë ose nuk janë respektuar rregullat dhe parimet – sidomos me rastin e përzgjedhjes së kandidatit përfundimtar, pastaj ndërprerje të marrëdhënies së punës, pezullim parandalues, vlerësime vjetore…”, ka thënë ai.

Një nga kritikat e vazhdueshme të Komisionit Evropian është edhe administrata e mbingarkuar. Manaj tnotë se administrata publike është në proces të reformimit prej vitit 2008-2009.

“Administrata publike jo veç në Kosovë, por në të gjitha vendet e rajonit është një prej sfidave në procesin e integrimeve, sepse ka probleme dhe vlerësohet se ka edhe mbingarkesë, por me këtë duhet të merret qeveria e Republikës së Kosovës dhe institucionet tjera”, thotë ai.

Manaj shprehet se në vitin 2015-të Këshilli ka zgjedhur 632 ankesa të nëpunësve civilë, ka vëzhguar rreth 48 procese të vëzhgimit për përzgjedhje të nëpunësve civilë të nivelit drejtues, si dhe ka monitoruar rreth 50 institucione të administratës publike.

“Nga të gjitha proceset e monitorimit në këtë institucione, kanë dal rreth 170 shkelje dhe njëkohësisht janë bërë 170 rekomandime për institucionet ku kanë ndodhur shkeljet” , shprehet Manaj. /tesheshi/