LAJMI I FUNDIT:

Sherri dhe arrestimet në Fushë-Krujë, sqaron policia: Kemi kryer të gjitha veprimet e nevojshme procedurale

Sherri dhe arrestimet në Fushë-Krujë, sqaron policia: Kemi kryer të gjitha veprimet e nevojshme procedurale
Foto: Ilustrim

Pas reagimeve në media për vonesa në reagimin e policisë pas dhunës barbare të ushtruar nga pjesëtarë të fisit Rraja ndaj dy pjesëtarëve të fisit Maja në fshatin Borizan të Fushë-Krujës, Policia ka sqaruar të gjitha veprimet që ka kryer pasi ka marrë denoncimin për guroren. 

Në një njoftim për shtyp, Policia e Krujës ka sqaruar se në përmbushje të plotë të detyrave funksionale, pas denoncimit të bërë nga shtetasi B. M., për shkatërrim të pronës, ka kryer të gjitha veprimet e nevojshme policore, dhe e ka referuar cështjet në Prokurori.

Deklarata e fortë e gazetarit: Policia fshehu ngjarjen e gurores, reagoi pas videos
Lexo po ashtu Deklarata e fortë e gazetarit: Policia fshehu ngjarjen e gurores, reagoi pas videos

“Në vijim, si rezultat i veprimeve konkrete hetimore dhe procedurale të kryera mbi këtë kallëzim, Policia e Krujës, më datë 10.05.2023, ka referuar në Prokurori, me shkresën nr. 1466, materialet procedurale prej 186 faqesh, për veprën penale “Shkatërrimi i pronës”, parashikuar nga neni 150 i Kodit Penal. Materialet e para procedurale përfshinin referimin e veprës penale, procesverbalin e këqyrjes së vendit të ngjarjes, procesverbalet e këqyrjes së banesave, procesverbalet e deklarimeve të personave që kanë djeni, vendimin për caktimin e ekspertit dhe për caktimin e ekspertimit teknik, si dhe procesverbalin për këqyrjen dhe marrjen e dokumenteve”, thuhet në njoftimin e policisë.

Policia ka shtuar se në vijim të veprimeve policore për këtë rast, Policia e Krujës, më datë 30.05.2023, ka referuar në Prokurori, me shkresën nr. 1466/1, materiale procedurale shtesë të kryera në funksion të dokumentimit të plotë ligjor të këtij rasti.

“Theksojmë se Policia e Krujës ka kryer të gjitha veprimet e nevojshme procedurale për këtë rast, me paanshmëri dhe konform ligjit, me qëllim dokumentimin e plotë ligjor të përgjegjësisë penale të shtetasve përgjegjës. Kallëzimi i marrë për këtë rast, si dhe çdo indicie tjetër, janë trajtuar në zbatim të procedurave standarde të punës dhe çdo material procedural i është referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për kryerjen e hetimeve të thelluara”, shton policia. /Telegrafi/