Selimi takohet me Kurtin, i jep përkrahjen e AAK-së për vettingun

Ish-ministri i Drejtësisë nga Aleanca për Ardhmërinë e Kosovës, Selim Selimi, është takuar sot me kryeministrin Albin Kurti, ku dhënë mbështetjen e partisë së tij për vettingun.

Kështu ka bërë të ditur për Telegrafin Lulëzim Blaka, zëdhënës i AAK-së.

“Në takim me kryeministrin Kurti për Vetingun, Aleanca është përfaqësuar nga ish Ministri i Drejtësisë Selim Selimi, u paraqit qëndrimi jonë se AAK këtë proces e konsideron të rëndësishëm dhe i jep përkrahje”, ka thënë Blaka.

Lexo po ashtu Qeveria: Kurti takoi Krasniqin, do të takojë edhe Haradinajn e nga LDK thonë se kontributin do ta japin në Kuvend

Sidoqoftë, AAK-ja nuk beson që procesi do të ketë sukses pa koncensus të plotë të brendshëm politik, pa përfshirjen e Këshillit Gjyqësor të Kosovës dhe Këshillin Prokurorial të Kosovës, pa mbështetjen e Shteteve të Bashkuara të Amerikës e Bashkimit Evropian si dhe pa përfilljen në përpikëri të qëndrimeve të Komisionit të Venedikut.

Kryeministri Kurti dje është takuar në Kuvendin e Republikës së Kosovës edhe me kryetarin e Partisë Demokratike të Kosovës, Memli Krasniqi.

Në njoftimin e Kryeministrisë u tha se së bashku me ministren e Drejtësisë, Albulena Haxhiu dhe zëvendësministren Nita Shala, Kurti foli për hapat e mëtejmë lidhur me këtë proces dhe rëndësinë e koordinimit të përbashkët.

Ndërsa, sipas Qeverisë, Kurti i ka bërë ftesë edhe Lidhjes Demokratike të Kosovës, por të njëjtit kanë deklaruar se do të japin kontributin e tyre në Kuvendin e Kosovës. /Telegrafi/