Reali nuk dorëzohet për Courtois, Chelsea e zëvendëson me Butland

Thibaut Courtois vazhdon të jetë njëri nga portierët më të kërkuar në Evropë.

Portieri belg po pëlqehet shumë nga kampionët e Francës, Paris Saint Germain por edhe ata të Evropës, Real Madrid.

Madrilenët mbetën favoritët për ta transferuar belgun në Santiago Bernabeu.

Courtois ka shprehur gatishmërinë për tu rikthyer në La Liga dhe për t’iu bashkuar madrilenëve.

26-vjeçari ka qenë pjesë e rivalëve të Realit, Atletico Madrid për dy sezone si i huazuar nga Chelsea.

Reali po mendon të dërgojë një ofertë prej 70 milionë eurove për transferimin e Courtois në Madrid.

Ndërkohë në Angli, mediat kanë raportuar se Chelsea është pajtuar me largimin e portierit.

Londinezët kanë gjetur edhe zëvendësuesin e Courtois në Ligën Premier.

Fjala është për portierin e parë të Anglisë, Jack Butland.

Butland ka rënë nga Liga Premier me Stoke Cityn këtë edicion dhe ka shprehur dëshirën për tu larguar.

Chelsea ka gati 20 milionë euro për transferimin e reprezentuesit anglez në Londër. /Telegrafi/