Wojciech Szczesny përballet me një ‘fantazmë’ të frikshme të El Clasicos këtë të diel në ‘Santiago Bernabeu’, ku portieri polak, tashmë numri 1 i Barcelonës për shkak të rikuperimit të Joan Garcias nga dëmtimi i meniskut, nuk ka arritur kurrë të mbajë portën e paprekur në gjashtë përballje ndaj Real Madridit, duke pësuar plot 11 gola, me një mesatare prej 1.8 për ndeshje.
“Kurbani” i parë i këtij mallkimi daton në sezonin 2015/2016, kur Szczesny mbronte portën e Romës në fazën e 1/16-ve të Ligës së Kampionëve. Një humbje 2-0 në ‘Santiago Bernabeu’ pas golave të Cristiano Ronaldos dhe James Rodríguez, që pasoi disfatën 2-0 në Olimpico nga Ronaldo dhe Jese.
Fati i tij u përkeqësua në sezonin 2017/2018, kur ai mbante fanellën e Juventusit në çerekfinale, hyri në lojë në minutat shtesë për të zëvendësuar Gianluigi Buffon, i cili u përjashtua me karton të kuq, vetëm për të parë Ronaldon të realizonte një penallti të diskutueshme që vulosi eliminimin me rezultatin e përgjithshëm 3-1, sukses që i dha Real Madridit trofeun e tretë radhazi të Ligës së Kampionëve.
Wojciech Szczesny
Kapitulli i tij me Barcelonën ka shtuar faqe të hidhura. Një karton i kuq në minutën e 57-të në finalen e Superkupës së Spanjës pas golit të Kylian Mbappe, pavarësisht rikthimit me rezultat 5-2, dy gola të pësuar në finalen e Kupës së Mbretit (nga Mbappe dhe Aurélien Tchouameni) dhe tre gola nga het-triku i Mbappes në një thriller 4-3 në ‘Montjuic’ në La Liga.
Në këtë sezon, Szczesny nuk ka arritur ende asnjë portë të pastër në pesë paraqitje, ka pësuar një gol ndaj Real Sociedad, dy ndaj PSG-së, katër në fushën e Sevillës dhe nga një gol ndaj Gironës e Olympiacosit.
Në moshën 35-vjeçare, portieri polak kërkon të thyejë mallkimin e tij ndaj Real Madridit dhe njëherësh të ruajë për herë të parë portën e paprekur me Barcelonën e Hansi Flick, e cila po kalon një formë mbresëlënëse./Telegrafi/
