Raporti i DASH, reagon ambasada amerikane në Tiranë: Mbështesim me forcë reformën në drejtësi

Ambasada e Shteteve të Bashkuara të Amerikës në Shqipëri ka reaguar sot pas publikimit të raportit të Departamentit Amerikan të Shtetit mbi të Drejtat e Njeriut.

Në një postim në Twitter, ambasada ka theksuar se SHBA mbështet me forcë reformën në drejtësi për t’i dhënë fund pandëshkueshmërisë, për llogaridhënie të zyrtarëve të korruptuar dhe krimit të organizuar, dhe forcimin e sundimit të ligjit në Shqipëri.

“SHBA-të janë të përkushtuara për të vënë demokracinë dhe të drejtat e njeriut në qendër të politikës sonë të jashtme”, ka shtuar ambasada.

“Siç vërehet në raportin mbi Shqipërinë, të drejtat e njeriut duhet të përfshijnë një gjyqësor të pavarur, të lirë nga presioni politik, frikësimi apo korrupsioni”, ka përmbyllur postimin ambasada.

Lexo po ashtu Raporti i DASH: Pavarësia e gjyqësorit, kufizimi i shprehjes së lirë, korrupsioni dhe pandëshkueshmëria, problemet kryesore në Shqipëri

Në raportin e publikuar një ditë më parë, DASH thekson se çështjet kryesore lidhur me të drejtat e njeriut në Shqipëri gjatë vitit 2021 ishin “problemet me pavarësinë e gjyqësorit ndërsa vazhdonte procesi i vetingut; kufizimet e lirisë së shprehjes dhe shtypit; dhe korrupsioni i përhapur në të gjitha degët e qeverisë dhe institucionet lokale”.

Këto përfundime përfshihen në raportin e përvitshëm të Departamentit të Shtetit për të drejtat e njeriut në botë.

“Mosndëshkimi mbeti një problem, megjithëse Organi i Specializuar për Antikorrupsionin dhe gjykatat antikorrupsion bënë përparim të rëndësishëm gjatë vitit në hetimin, ndjekjen penale dhe dënimin e zyrtarëve të lartë dhe krimit të organizuar”, thuhet ndër të tjera në raport. /Telegrafi/

(1/3) ?? janë të përkushtuara për të vënë demokracinë dhe të drejtat e njeriut në qendër të politikës sonë të jashtme. Lexoni raportin e Departamentit të Shtetit mbi Të Drejtat e Njeriut ?https://t.co/D2LZ517CxU

— USEmbassyTirana (@USEmbassyTirana) April 13, 2022