Botë Nga Bota Evropa

Raketat ruse po dështojnë në shkallë të lartë, thonë zyrtarë amerikanë

Para 3 vitesh

Shtetet e Bashkuara vlerësojnë se në ditë të caktuara po dështojnë deri në 60 për qind e raketave ruse me sisteme drejtimi me precizet të lartë, thanë për agjencinë reuters tre zyrtarë amerikanë në dijeni të të dhënave të zbulimit.

Ky informacion i ri mund të ndihmojë për të shpjeguar se përse Rusia nuk ka arritur objektivat bazë që nga fillimi i sulmit të saj një muaj më parë, si p.sh. neutralizimin e forcave ajrore të Ukrainës, pavarësisht fuqisë së dukshme të ushtrisë së saj kundër forcave të armatosura të Ukrainës me përmasa shumë më të vogla.

Zyrtarët amerikanë, të cilët folën në kushte anonimiteti për shkak të ndjeshmërisë së informacionit, nuk dhanë prova për të mbështetur këtë vlerësim dhe nuk bënë të ditur se çfarë saktësisht po shkaktonte shkallën e lartë të dështimit të raketave ruse.

Agjencia e lajmeve reuters nuk arriti të verifikonte në mënyrë të pavarur shifrat.

Kremlini dhe Ministria e Mbrojtjes e Rusisë nuk iu përgjigjën menjëherë një kërkese për koment.

Një shkallë kaq e lartë e dështimit mund të përfshijë çdo gjë, nga defekte në lëshim, deri tek raketat që nuk shpërthejnë në goditje.

Zyrtarët amerikanë të mbrojtjes u thanë gazetarëve këtë javë se Pentagoni vlerëson se Rusia ka lëshuar më shumë se 1100 raketa të të gjitha llojeve që nga fillimi i luftës. Zyrtarët amerikanë deri më tani nuk kanë thënë se sa prej tyre goditën objektivat e tyre dhe sa dështuan.

Duke cituar inteligjencën amerikane, tre zyrtarë amerikanë thanë se Shtetet e Bashkuara vlerësonin se shkalla e dështimit të Rusisë ndryshonte çdo ditë, se varej nga lloji i raketës që do të lëshohej dhe se ndonjëherë mund të kalonte nivelin 50%. Dy prej tyre thanë se arriti deri në 60%.

Një nga zyrtarët tha se të dhënat e zbulimit tregojnë se raketat ruse të lëshuara nga ajri kishin një shkallë dështimi në intervalin nga 20 për qind deri në 60 për qind, në varësi të ditës.

Rusia është parë duke vënë në përdorim dy lloje të raketave me vetëdrejtim të lëshuara nga ajri në Ukrainë, Kh-555 dhe Kh-101, sipas Projektit të Mbrojtjes nga Raketat, të Qendrës për Studime Strategjike dhe Ndërkombëtare.

Agjencia e lajmeve reuters nuk mundi të përcaktojë se cila do të ishte një normë standarde e dështimit për raketat e lëshuara nga ajri. Dy ekspertë të intervistuar thanë se çdo shkallë dështimi prej 20% e lart do të konsiderohej e lartë.

Shtetet e Bashkuara besojnë se Rusia lëshoi raketa me vetëdrejtim nga ajri nga hapësira ajrore ruse në fillim të këtij muaji, kur sulmoi një bazë ushtarake ukrainase pranë kufirit polak dhe një nga zyrtarët amerikanë tha se kishte një shkallë veçanërisht të lartë dështimi gjatë këtij sulmi. Sulmi vrau 35 persona, sipas autoriteteve ukrainase.

Sulmet me raketa kanë qenë një tipar i pushtimit rus, dhe Rusia njoftoi për sulme kundër objektivave ushtarake, përfshirë depot e armëve.

Ofensiva ka vrarë mijëra persona dhe ka dëbuar një të katërtën e 44 milionë njerëzve të Ukrainës nga shtëpitë e tyre. Bombardimet kanë goditur zonat e banuara, shkollat dhe spitalet në qytetet e Ukrainës, përfshirë Kharkivin dhe qytetin port të rrethuar Mariupol, në Detin Azov.