Protestojnë punëtorët e Pallatit të Rinisë, nuk i kanë marr pagat që dy muaj

Mos marrja e pagave për dy muaj ka shtyrë punëtorët e Pallatit të Rinisë në Prishtinë, që të protestojnë, ata paralajmërojnë se nuk do t’i ndalin protestat deri në marrjen e pagave.

Kryetari i Sindikatës së Pavarur të Pallatit të Rinisë, Enver Musiqi, ka thënë për Telegrafin se ka dy muaj që punëtorët nuk kanë marrë pagat dhe se për këtë çështje kanë komunikuar me zyrtarët e Agjencisë së Kosovare të Privatizimit dhe Komunës së Prishtinës, por sipas tij ata po ia hedhin fajin njëri-tjetrit për mos dhënie të pagave.

“Arsyeja pse po protestojmë është për shkak të mos marrjes së pagave që nga muaji korrik. Kemi kontaktuar me institucionet e administratës të Agjencisë së Privatizimit, pastaj edhe me të Komunës së Prishtinës. Kështu që kemi qenë punëtorë të Administratës së autoritetit të likuidimit të Agjencisë Kosovare të Privatizimit, një marrëveshje që është arritur mes Komunës së Prishtinës dhe AKP-së kemi kaluar nën kompetencat e komunës”, tha për Telegrafin, Musiqi.

Ai tha se kanë mbetur në udhëkryq, ku nuk e dinë se nga kush të kërkojnë përgjegjësi për mos marrjen e pagave.

“Kur kërkojmë llogari nga Agjencia Kosovare e Privatizimit ata thonë se ka një obligim Komuna e Prishtinës”, tha ai.

Musiqi thotë se do të marrin masa të tjera, duke e përshkallëzuar protestën apo grevën.

“Nëse nuk bëhet një zgjidhje, atëherë do ta përshkallëzojmë protestën deri në hyrja në greve duke mos i kryer shërbimet nga ana e punëtorëve”, tha ai.

Lexo po ashtu Pallati i Rinisë transferohet te Komuna e Prishtinës

Kujtojmë se Qeveria e Kosovës në muajin dhjetor 2017 kishte marrë vendim që Pallati i Rinisë dhe Sporteve nga Agjencia Kosovare e Privatizimit të kalojë në pronësi të Komunës së Prishtinës, ndërkohë që zyrtarisht më 12 shtator 2018 ishte bërë dorëzimi nën kompetencat e Komunës së Prishtinës. /Telegrafi/